Landsbankinn hefur innleitt nýja stefnu og verkferla við sölu eigna. Breytingin kemur í kjölfarið á gagnrýni sem bankinn hefur fengið vegna sölu hans á eignarhluta hans í kortafyrirtækinu Borgun. Þetta kemur fram í tilkynningu frá bankanum.
Í tilkynningunni segir:
„Undirbúningur og ákvarðanir bankans um sölu á hlutum í Borgun höfðu það eina markmið að gæta hagsmuna bankans, eins og þeir voru metnir á þeim tíma í ljósi þeirra upplýsinga sem þá lágu fyrir. Engir annarlegir hvatar eða sjónarmið voru að baki ákvörðunar um að selja hlutinn á þann hátt sem gert var.“
Bankinn segir að á síðustu mánuðum þá hafi komið fram upplýsingar um að Borgun muni fá töluverð verðmæti í sinn hlut vegna yfirtöku Visa Inc. á Visa Europe. Bankinn hefur því samþykkt aðgerðaráætlun til að efla stjórnarhætti bankans við sölu eigna.
Helstu liðir áætlunarinnar eru:
- Markmið stefnunnar er að tryggja vandaða stjórnarhætti um sölu eigna og takmarka rekstraráhættu og orðsporsáhættu sem sala eigna getur falið í sér. Í nýju stefnunni er kveðið á um að meginreglan sé að söluferli sé opið. Frávik frá þeirri meginreglu verður að vera rökstutt, skráð og háð samþykki bankaráðs. Í stefnunni er skilgreint hvaða eignir teljast til mikilvægra eigna með tilliti til verðmætis og orðsporsáhættu. Sala mikilvægra eigna skal háð sérstöku mati á orðsporsáhættu og samþykki bankaráðs.
-
Settar verða skráðar verklagsreglur um sölu allra helstu flokka eigna, sem byggja á nýrri stefnu bankans um sölu eigna. Slíkar verklagsreglur eru þegar til staðar um tiltekna eignaflokka og verða þær uppfærðar. Í verklagsreglunum verður að finna:
a. Ákvæði um stjórnarhætti varðandi sölu eigna.
b. Skilgreiningu á opnu söluferli fyrir hvern eignaflokk.
c. Leiðbeiningar um mat á orðsporsáhættu.
d. Kröfu um gagnsæi og að upplýsingar um eignir til sölu séu aðgengilegar.
e. Leiðbeiningar um hvenær afla skuli verðmats og áreiðanleikakönnunar ytri aðila við sölu á mikilvægum eignum. - Stefna og verklag tekur mið af áhættu og verður háð þriggja þrepa eftirliti, þar sem starfsmenn og stjórnendur, eftirlitseiningar og innri endurskoðun hafa hvert um sig tilteknu hlutverki að gegna.
- Árlega verður birt skýrsla á vef bankans þar sem veittar verða upplýsingar um eignir sem eru til sölu og eignir sem seldar hafa verið undanfarna 12 mánuði.
- Sett hefur verið sérstök stefna um orðsporsáhættu. Stefnunni er ætlað að auðvelda starfsmönnum bankans að meta orðsporsáhættu við sölu eigna. Stefnan skal endurspeglast í starfsemi bankans og vera hluti af áhættustjórnun hans. Í stefnunni eru sett viðmið um með hvaða hætti Landsbankinn leggur mat á orðsporsáhættu og hvernig unnið er að því að lágmarka orðsporsáhættu bankans og tjón sem af henni getur hlotist.
Landsbankinn áætlar að ljúka innleiðingu aðgerðanna fyrir 1. júlí 2016.
Fjármálaeftirlitið birti í dag niðurstöðu athugunar á söluferli Landsbankans á Borgun. Eftirlitið sagði að ferlinu hafði verið áfátt og að hún hafi ekki að öllu leyti samræmst eðlilegum og heilbrigðum viðskiptaháttum á fjármálamarkaði.