Forsvarsmenn Þórsbergs ehf. á Tálknafirði hafa gert samning við Brim hf. um kaup á öllu hlutafé í útgerðarfélaginu Grábrók ehf. Þórsberg ehf. mun greiða fyrir viðskiptin með hlutafé í félaginu og mun Brim eiga tæplega 41% hlut í Þórsbergi eftir viðskiptin. Frá þessu er greint í tilkynningu frá Brimi.
Grábrók ehf. hefur gert út krókabátinn Steinunni HF 108. Með honum fylgir um 850 tonna krókaflamark, að mestu í þorski. Fram kemur að með kaupunum er Þórsberg að setja styrkari stoðir undir starfsemi sína.
- Sjá einnig: Á nú fyrir 36 milljarða í Brim
Við þessi viðskipti myndast ekki söluhagnaður eða sölutap hjá Brimi hf. Samningurinn er gerður með fyrirvara um niðurstöðu áreiðanleikakönnunar og eftir atvikum annarra eftirlitsaðila.
