Í þingsályktunartillögu utanríkisráðherra eru gerð drög að breyttu lagaverki um þjóðaröryggi. Tillagan verður rædd á fundi utanríkismálanefndar fyrir hádegi í dag. Hana má lesa í heild sinni hér .
Í tillögunni er til að mynda snert á því að sett verði á laggirnar með sérstökum lögum þjóðaröryggisráð, sem metur ástand og horfur í öryggis- og varnarmálum með reglulegum hætti. Þá myndi öryggisráðið einnig hafa eftirlit með framfylgd þjóðaröryggisstefnu og endurskoða hana á fimm ára fresti.
Fram kemur að gert sé ráð fyrir því í frumvarpi til fjárlaga 2016 að framlög til öryggismála verði aukin um einhverjar 213 milljónir króna vegna þróunar í öryggismálum Evrópu.
Setja umhverfisvá og netógnir í forgang
Nefnd um mótun þjóðaröryggisstefnu skilaði af sér skýrslu með tillögum sem þingsályktunartillagan tekur mið af. Tillagan skiptir hættunum sem steðja að Íslandi upp í þrjá flokka.
Flokkur 1. Hættur sem ber að setja í forgang með hliðsjón af viðbúnaði og fjármunum:
- Umhverfisvá eða slys vegna aukinna umsvifa á norðurslóðum.
- Netógnir og skemmdarverk á innviðum samfélagsins.
- Náttúruhamfarir.
Flokkur 2. Ógnir sem þarfnast fullrar athygli:
- Skipulögð glæpastarfsemi.
- Fjármála- og efnahagsöryggi.
- Fæðu- og matvælaöryggi.
- Heilbrigðisöryggi og farsóttir.
- Hryðjuverk.
Flokkur 3. Hættur sem ólíklegt er að steðji að Íslandi en mundu vega að fullveldi og sjálfstæði landsins:
- Hernaðarógn.
Þess ber að geta að í skýrslu nefndarinnar, sem er skráð sem fylgiskjal með þingsályktunartillögunni, eru hryðjuverk sett í 3. flokk ásamt hernaðarógn. Hryðjuverk hafa því færst upp um einn flokk. Þetta er gert í samræmi við mat ríkislögreglustjóra sem gefið var út þann 20. febrúar 2015.
