Hinn alræmdi Jordan Belfort, sem kvikmyndin „the Wolf of Wall Street“ byggir á, varar óreynda fjárfesta við því að þeir geti tapað öllu á GameStop.
BBC greinir frá því að Belfort, sem dæmdur var í fangelsi fyrir markaðsmisnotkun árið 1999, segi fjárfestingar af þessu tagi vera „frábærar“ í uppsveiflunni en „sársaukafullar“ á niðurleiðinni. Belfort segist skilja að GameStop heilli áhugafjárfesta sem vilja bjóða stóru fjármálafyrirtækjunum á Wall Street birginn. Þeir þurfi þó að fara gætilega, að lokum muni gengi bréfanna „hrynja aftur til jarðar“ og sömu sögu sé að segja um silfrið.
- Sjá einnig: Reddit-fjárfestarnir snúa sér að silfri
Þá segir Belfort að ef fólk ætli að byggja framfærslu sína á fjárfestingum af þessum toga, verði það að grípa hnífinn á lofti á niðurleiðinni, um leið og hann hvetur fólk til að ganga frá borði áður en skipið sekkur.
Gengi hlutabréfa í GameStop hefur áttfaldast undanfarnar vikur, eftir að Reddit-fjárfestar tókust á við Wall Street fjárfesta sem tekið höfðu skortstöðu í bréfum tölvuverslunarkeðjunnar. Reddit-fjárfestarnir höfðu betur í glímunni en stórir vogunarsjóðir neyddust til að loka stöðu sinni með miklu tapi.
- Sjá einnig: Vogunarsjóður tapaði 53% vegna Gamestop
