„Í grunninn er Kvika fjölbreytt fjármálaþjónustufyrirtæki með víðtæka starfsemi á hinum ýmsu sviðum. Við erum með stóra markaðshlutdeild innan flestra starfseininga. Á viðskiptabankasviðinu erum við aftur á móti með frekar litla markaðshlutdeild og fyrir vikið sjáum við einna mesta vaxtamöguleika þar,“ segir Ármann Þorvaldsson, sem nýverið tók á ný við forstjórastarfinu hjá Kviku banka. Hann segir að ekki standi til, a.m.k. eins og staðan er í dag, að leitast eftir samrunaviðræðum við annan stóran banka.