Bjarni Benediktsson tilkynnti um afsögn sína sem fjármálaráðherra á blaðamannafundi í gærmorgun. Tilefnið var álit umboðsmanns Alþingis um að ráðherrann hefði brostið hæfi við sölu á 22,5% eignarhlut ríkisins í Íslandsbanka í mars 2022 en félag í eigu föður Bjarna var meðal kaupenda. 

Ákvörðunin virtist koma flestum á óvart, ef ekki öllum, en þingflokkur Sjálfstæðisflokksins heyrði til að mynda af afsögninni á sama tíma og þjóðin öll. Margir þingmenn stjórnarandstöðunnar fögnuðu ákvörðuninni og virtust að ákveðnu marki hrósa Bjarna fyrir að axla ábyrgð.