Elín Hall hefur skipað sér sess sem einn af fjölhæfustu listamönnum landsins. Hún er þekkt bæði sem leikkona og tónlistarkona og hefur tekið þátt í metnaðarfullum verkefnum bæði á sviði og í kvikmyndum. Þrátt fyrir ungan aldur hefur hún þegar leikið í stórmyndum eins og Ljósbroti, sem var heimsfrumsýnd á hinni virtu kvikmyndahátíð í Cannes, og í kvikmyndinni Lof mér að falla. Á sama tíma hefur hún gefið út tónlist og haldið fjölda tónleika.

Elín var nýbúin að halda útgáfutónleika fyrir plötuna sína Heyrist í mér þegar viðtalið var tekið. Hún lýsir gleði og spennufalli í kjölfar tónleikanna. „Það gekk ógeðslega vel, en ég er í miklu spennufalli,“ segir hún og hlær. „Ég hef aldrei haldið tónleika af þessu kaliberi sjálf. Ég hef komið fram á ýmsum hátíðum fyrir stærri áhorfendahópa, en það var ótrúlega gaman að troðfylla Iðnó.“