Þriðja kynslóð Range Rover Sport, sem kom á markað fyrir um tveimur árum, hefur notið vinsælda hér á landi. Bíllinn býður upp á sportlegan lúxus með magnaðri akstursupplifun, góðri getu í torfærum og nýjustu tækni. Við reynsluókum gripnum á dögunum í tvinnútgáfu, með þriggja lítra og sex sílendra bensínvél og rafmótor.

Range Rover Sport hefur breyst mikið frá því að hann kom á markað fyrst árið 2005 en á þeim árum voru sportlegir jeppar að koma inn á markaðinn. Það var talsverð bylting þegar önnur kynslóðin kom árið 2013. Þá léttist hann um allt að 420 kíló og varð mun sportlegri.