Nice er ein fallegasta borg Frakklands og hluti af frönsku rivíerunni. Borgin er þekkt fyrir milt loftslag, glæsilega byggingarlist, stórbrotið landslag og ríkulega menningu. Hér mætast franskur lífsstíll og suðræn afslöppun, sem gerir borgina að eftirsóknarverðum áfangastað fyrir þá sem vilja njóta lífsins.

Icelandair býður beint flug frá Íslandi stóran hluta árs en á öðrum árstímum er hægt að fljúga með millilendingu í París eða Kaupmannahöfn.

Hér skaltu dvelja

Nice býður upp á fjölbreytt úrval gistimöguleika, hvort sem þú kýst sögufrægan lúxus eða smærri boutique-hótel með persónulegri þjónustu. Hér eru nokkur af bestu hótelum borgarinnar:

Hotel Negresco

Þetta glæsilega hótel við Promenade des Anglais er eitt helsta kennileiti Nice. Það var opnað árið 1913 og hefur hýst allt frá listamönnum til heimsfrægra kvikmyndastjarna. Innréttingarnar eru stórfenglegar, með blöndu af Belle Époque-þokka og nútímalegri frönskum stíl. Michelin-stjörnu veitingastaðurinn Le Chantecler á hótelinu er fullkominn fyrir þá sem vilja hápunkt franskrar matargerðar.

Hyatt Regency Nice Palais de la Méditerranée

Þú þarft ekki að velja milli útsýnis yfir borgina eða hafið, því hér færðu hvort tveggja. Með bæði innisundlaug og útisundlaug, heilsulind og glæsilega veitingastaðinn Le 3e, er þetta hótel frábær kostur fyrir þá sem vilja blöndu af nútímaþægindum og sjarma.

Hotel La Pérouse

Ef þú vilt frekar rólegra umhverfi með stórkostlegu útsýni yfir Baie des Anges, þá er Hotel La Pérouse fyrir þig. Þetta hótel er rétt við Castle Hill og býður upp á fallega hannaðar svalir, heilsulind og upphitaða sundlaug þar sem hægt er að njóta morgunkaffisins í sólinn

Hér skaltu borða

Matarhefðir í Nice eru undir miklum áhrifum frá Ítalíu og Miðjarðarhafinu, en borgin á líka sína eigin sérstöku matarmenningu. Hér eru nokkrir af bestu veitingastöðunum í borginni:

Bistrot d’Antoine

Líflegur bistro með hefðbundnum suður-frönskum réttum. Vinsæll bæði meðal heimamanna og ferðamanna, svo það er ráðlegt að bóka borð með fyrirvara.

Le Chantecler

Michelin-stjörnu veitingastaður á Hotel Negresco, þar sem hægt er að njóta glæsilegra franskra rétta í stórbrotnu umhverfi.

La Merenda

Lítill og látlaus veitingastaður sem sérhæfir sig í hefðbundinni matargerð frá Nice. Engin símanúmer, engar kortagreiðslur – aðeins frábær matur í afslöppuðu umhverfi.

Þetta skaltu skoða og gera

Nice er meira en bara strendur og góður matur – borgin er full af sögu, listum og menningu. Hér eru nokkrir staðir sem þú mátt ekki missa af:

Promenade des Anglais

Þessi heimsfræga strandgata var upphaflega byggð af enskum ferðamönnum á 19. öld, og enn þann dag í dag er hún einn besti staðurinn til að njóta sjávarloftsins. Hvort sem þú vilt hjóla, skokka eða einfaldlega setjast niður með ís og fylgjast með fólkinu, þá er „Prom“ ómissandi hluti af Nice-reynslunni.

Gamli bærinn (Vieux Nice)

Nice var upphaflega ítölsk borg, og það sést greinilega í gamla bænum, þar sem þröngar götur, hlýleg pastel-lituð hús og líflegir markaðir skapa ómótstæðilega stemningu. Hér má finna smáverslanir með handgerðar vörur, gullfallegar kirkjur eins og Sainte-Réparate dómkirkjuna og auðvitað Cours Saleya markaðinn, þar sem hægt er að smakka á ferskum ávöxtum, ostum og frönskum gourmet-réttum.

Matisse-safnið (Musée Matisse) Henri Matisse elskaði Nice og eyddi stórum hluta ævi sinnar í borginni. Í þessu fallega safni, sem er í hæðunum yfir borginni, er hægt að sjá hvernig list hans þróaðist frá fyrstu skissum til hans seinni meistaraverka. Ef þú hefur áhuga á list eða vilt einfaldlega fá innblástur, þá er þetta skyldustopp.

Colline du Château

Þó að kastalinn sem eitt sinn gnæfði yfir borgina sé horfinn, er þessi hæð enn einn besti útsýnisstaðurinn í Nice. Hér geturðu notið fallegra garða, lítilla gosbrunna og stórfenglegs útsýnis yfir ströndina og gamla bæinn. Lyftan upp er ókeypis – en ef þú vilt brenna af þér croissantið úr morgunverðinum, þá er gönguleiðin líka frábær valkostur.

Jardin du Monastère

Við Monastère de Cimiez finnurðu þennan kyrrláta klausturgarð, þar sem blómstrandi beð og stór tré skapa sannkallaða græna paradís í borginni. Fullkominn staður til að slaka á eftir dag af gönguferðum og listaskoðun.