Hið hátt í 180 milljarða króna kaupverð sem danska fyrirtækið Coloplast greiðir fyrir Kerecis er ríflega 40% hærra en í sambærilegum viðskiptum með fyrirtæki sem sérhæfa sig í sáravörum að undanförnu að sögn Andra Sveinssonar, stjórnarformanns íslenska lækningavörufyrirtækisins.

Samkvæmt greiningu Kerecis í aðdraganda viðskiptanna hefur margfaldari í sambærilegum viðskiptum verið upp undir áttföld sala á undangengnum tólf mánuðum. Verðmiðinn á Kerecis jafngildir hins vegar í kringum tólfföldum sölutekjum á síðustu tólf mánuðum.

„Þetta er yfirverð (e. premium) á markaðinn, sem er frábært fyrir okkur,“ sagði Andri í samtali við Viðskiptablaðið eftir kynningarfund Kerecis á föstudaginn í síðustu viku. Hann rakti háan margfaldara hjá Kerecis til sterkrar samningsstöðu.