„Að opna rafhlaupahjólaleigu í landi þar sem er vont veður og langir vetur er eflaust ekkert sérstaklega rökrétt. En við höfum góða reynslu af því að reka slíkar leigur í Noregi, Svíþjóð og Finnlandi, sem og í öðrum löndum í Evrópu þar sem aðstæður eru ekki ósvipaðar og á Íslandi,“ segir Martin Tansøy, rekstarstjóri Bolt, þegar hann er spurður af hverju félagið hafi ákveðið að opna á Íslandi.

Bolt er leiðandi deilisamgöngufyrirtæki í Evrópu, en forstjóri Bolt, Mark Villig, stofnaði félagið í Eistlandi árið 2013 þegar hann var einungis 19 ára. Bolt hefur vaxið hratt síðan þá og er appið með yfir 200 milljónir viðskiptavina í yfir 50 löndum og yfir 600 borgum í Evrópu og Afríku. Fyrirtækið býður upp á rafhlaupahjóla- og rafhjólaleigu í meira en 250 borgum í 25 löndum. Þar fyrir utan hefur Bolt gert sig gildandi á leigubílamarkaði og matarsendingum, auk þess sem deilibílaleigan Bolt Drive, hefur vaxið fiskur um hrygg.