Lilja Dögg Alfreðsdóttir viðskiptaráðherra kynnti á dögunum skýrslu starfshóps sem var falið að kanna gjaldtöku og arðsemi stærstu viðskiptabankanna. Hópurinn fundaði 22 sinnum á rúmu ári og er afraksturinn ríflega 100 blaðsíðna skýrsla þar sem farið er yfir helstu niðurstöður og tillögur.

Við lestur skýrslunnar er fátt sem kemur á óvart og lítið virðist hafa breyst frá því að Hvítbók um framtíðarsýn fyrir fjármálakerfið var gerð árið 2018. Helstu niðurstöður snúa að ógagnsærri gjaldtöku bankanna og tillögur hópsins virðast almennar á því sviði. Miðað við skipunarbréf hópsins og ummæli semm viðskiptaráðherra hefur látið falla mátti ætla að staðan væri mun verri en raun ber vitni.