Árið byrjaði illa í baráttunni við verðbólguna og vonir um að toppi stýrivaxta væri náð í þessari viðureign urðu fljótt að engu. Alls hækkaði Seðlabankinn vexti um rúm þrjú prósentustig í ár, og fjármálamarkaðir fóru ekki varhluta af því enda öfugt samband milli vaxtastigs og verðmats fyrirtækja samkvæmt bókinni.

Eflaust hefur árið því verið mörgum fjárfestum þungt enda kom það á hæla eins af þeim blóðugustu í seinni tíð. Þó má ekki gleyma því úr hvaða methæð markaðurinn hefur verið að falla síðustu tvö ár, og þótt margir hluthafar skráðra félaga fari líklega nokkuð hvekktir inn í nýtt ár hafa síður en svo allar fréttir úr Kauphöllinni verið neikvæðar nýverið.

Hampiðjan stimplaði sig inn á aðalmarkað á ný eftir hátt í tveggja áratuga fjarveru í vor og hélt af því tilefni vel heppnað almennt útboð, og þótt blekið sé varla þornað á útboði Ísfélagsins þegar þetta er skrifað er þegar orðið óhætt að segja að þar hafi tekist með eindæmum vel til.