Í maí á þessu ári höfðu lífeyrissjóðirnir keypt gjaldeyri fyrir um 43 milljarða króna það sem af er ári og selt fyrir um 3,53 milljarða króna. Hrein gjaldeyriskaup þeirra á árinu 2022 stóðu þá í 36,96 milljörðum króna.
Á sama tíma í fyrra höfðu lífeyrissjóðirnir keypt gjaldeyri fyrir um 28,34 milljarða króna það sem af var árs og selt gjaldeyri fyrir 8,5 milljarða króna. Hrein gjaldeyriskaup lífeyrissjóðanna á tímabilinu janúar til maí í fyrra stóðu því í 19,84 milljörðum íslenskra króna.
Samkvæmt Fjármálastöðugleika, riti Seðlabanka Íslands, hefur fjölgað í hópi lífeyrissjóða sem selja gjaldeyri en sala á gjaldeyri haldist mikið í hendur við þá sjóði sem eru nálægt innri viðmiðum um hlutfall eigna í erlendum gjaldeyri af heildareignum.
„Hlutfall eigna í erlendum gjaldeyri var 37,7% af heildareignum sjóðanna en lögum samkvæmt geta gjaldeyriseignir verið að hámarki 50% af heild. Innri viðmið sjóðanna sjálfra eru hins vegar gjarnan eilítið lægri. Í ljósi síhækkandi hlutfalls gjaldeyriseigna af heildareignum hafa sveiflur í gengi krónunnar aukin áhrif á virði eignasafns sjóðanna og árlega ávöxtun,“ segir í Fjármálastöðugleika.
Þá má einnig nefna að í upphafi heimsfaraldursins biðlaði Seðlabankinn til lífeyrissjóðanna að halda að sér höndum.
Fréttin er hluti af lengri umfjöllun í nýjasta tölublaði Viðskiptablaðsins.
