Dómur í Bretlandi féllst á allar kröfur Samherja í máli þeirra gegn Oddi Eysteini Friðrikssyni vegna brota á vörumerkjaréttindum félagsins.
Á síðasta ári setti Oddur upp heimasíðu í nafni Samherja með breskri lénaskráningu þar sem hann villti á sér heimildir og notfærði sér hugverk í eigu félagsins.
Umrædd síða var látin líta út fyrir að vera raunveruleg vefsíða í eigu Samherja. Þá dreifði hann fölskum tilkynningum í nafni félagsins.
Með dómi sem kveðinn var upp í morgun kemur fram að Oddi Eysteini hafi verið þetta óheimilt og var málsástæðum hans um listrænan gjörning hafnað.
Samkvæmt tilkynningu frá Samherja sló dómurinn því föstu að notkun vörumerkis Samherja við hönnun vefsíðunnar hafi verið gerð í því skyni að ljá vefsíðunni trúverðugleika en ekki í þeim tilgangi að varpa fram gagnrýni.
„Notkun vörumerkis og öll framsetning vefsíðunnar hafi verið eins og um væri að ræða opinbera vefsíðu félagsins. Þannig hafi hönnun síðunnar hvorki falið í sér listræna skopstælingu né skrumskælingu sem rúmast innan þess tjáningarfrelsis sem listamenn njóta,“ segir í tilkynningu útgerðarfélagsins.
Samkvæmt dómsniðurstöðunni sýndi uppsetning vefsíðunnar á léni með nafni félagsins, og vísvita framsetning rangra upplýsinga þar inni ásetning um blekkingar.
Dómarinn sagði að framangreint fæli í sér ólögmætar skerðingar á tjáningarfrelsi enda geti tjáningarfrelsi sætt takmörkunum vegna lögbundinna réttinda annarra og þar undir falla vörumerkja- og hugverkaréttindi.
„Við erum að sjálfsögðu ánægð með þessa niðurstöðu. Við vorum knúin til þess að verja vörumerki okkar með málshöfðun þegar öllum mildari úrræðum var hafnað. Dómurinn er afdráttarlaus um hvað geti flokkast sem listræn tjáning og hvað teljist misnotkun á skráðu vörumerki. Sú niðurstaða hlýtur að vera alvarlegt umhugsunarefni fyrir þær menntastofnanir sem lögðu blessun sína yfir augljós vörumerkjabrot undir formerkjum listsköpunar,“ segir Þorsteinn Már Baldvinsson, forstjóri Samherja hf.
