Hlutabréfaverð Alvotech lækkaði um rúm 2% í Kauphöllinni í dag en félagið birti árshlutauppgjör fyrir opnun markaða í morgun.
Tekjur líftæknilyfjafyrirtækisins námu 339 milljónum Bandaríkjadala á fyrstu níu mánuðum ársins sem er um 300 milljóna dala tekjuaukning á milli ára.
Þrátt fyrir rekstrarhagnað annan fjórðunginn í röð var bókfært tap á fyrstu níu mánuðum ársins 164,9 milljónir dala sem rekja má að mestu til gangvirðisbreytinga á afleiðutengdum skuldum sem ekki hafa áhrif á handbært fé félagsins.
Um 423 milljón króna velta var með bréf félagsins í dag en gengi Alvotech hefur lækkað um 8% í nóvembermánuði.
Hlutabréfaverð Amaroq lækkaði einnig um 2% en málmleitarfélagið birti einnig árshlutauppgjör fyrir opnum markaði í morgun. Í uppgjörinu sagði Eldur Ólafsson, forstjóri Amaroq, fyrirtækið hafi náð verulegum framförum í uppbyggingu í Nalunaq á þriðja ársfjórðungi.
„Við erum nú við það að hefja vinnslu á gulli úr Nalunaq, sem er afar stór áfangi fyrir félagið og mun skila tekjuflæði samhliða því sem við vinnum okkur upp í fulla framleiðslu,“ segir Eldur.
Í lok fjórðungsins var félagið með 26 milljónir kanadadali á hendi sem samanst af handbæru fé, ónotuðum lánalínum og lausafé eftir að hafa dregið frá viðskiptaskuldir.
Mun það vera lækkun úr 62,2 milljónum dala í lok annars ársfjórðungs.
Málmleitarfélagið gerði í júlímánuði samkomulag við Landsbankann um þrjár lánaheimildir að andvirði 35 milljónir kandadala. Samkvæmt uppgjörinu tryggja lánalínurnar verulega aukningu og framlengingu á núverandi lánalínum.
Hlutabréf í Sýn lækkuðu einnig í dag en félagið birti uppgjör eftir lokun markaða í gær. Gengi félagsins fór niður um tæp 6% í lítilli veltu en í hádeginu í dag var kynnt ný stefnumótun hjá fjarskipta- og fjölmiðlafyrirtækinu.
Hlutabréfaverð Marels leiddi hækkanir á aðalmarkaði er gengi félagsins fór upp um 2% í 1,4 milljarða króna veltu. Dagslokagengi Marels var 612 krónur.
Úrvalsvísitalan OMXI15 hækkaði um 0,37% og var heildarvelta á markaði 4,1 milljarður.
