Hlutabréfaverð Icelandair hækkaði um tæp 5% í um 366 milljón króna viðskiptum í dag.
Dagslokagengi Icelandair var 1,22 krónur og hefur gengi flugfélagsins ekki verið hærra síðan í febrúar.
Icelandair birti farþegatölur í síðustu viku sem sýndu að flugfélagið hefur flutt yfir 4 milljónir farþega á árinu sem er um 8% fleiri en á sama tíma í fyrra. Að sögn Boga Nils Bogasonar, forstjóra Icelandair, er eftirspurn eftir Íslandsferðum að aukast.
Þá lækkaði verðið á Brent-hráolíu í dag en tunnan af Brent hefur lækkað um rúm 5% síðustu fimm daga. Tunna af Brent-hráolíu stendur í 71 dal þegar þetta er skrifað sem er með því lægsta á árinu en Brent-hráolía er meðal annars notuð í flugvélaeldsneyti.
Hlutabréfaverð Play hækkaði um 2,5% í örviðskiptum sem voru undir einni milljón. Dagslokagengi Play var 1,01 króna.
Gengi Reita nálgast sitt hæsta gildi
Hlutabréfaverð Reita hélt áfram að hækka í viðskiptum dagsins en fasteignafélagið birti uppgjör eftir lokun markaða á mánudaginn. Gengi félagsins hefur nú hækkað um tæp 9% síðastliðna þrjá viðskiptadaga.
Dagslokagengi var 106 krónur og hefur ekki verið hærra síðan í maí 2017 þegar gengi félagsins fór í sitt hæsta gildi frá skráningu og stóð í 109 krónum.
Gengi Sýnar hækkaði um 2,6% í 49 milljón króna viðskiptum í dag en fjarskiptafélagið birtir árshlutauppgjör eftir lokun markaða í dag.
Hlutabréfaverð Nova leiddi lækkanir er gengi fjarskiptafélagsins fór niður um rúm 3% í 152 milljón króna viðskiptum.
Úrvalsvísitalan lækkaði um 0,53% og var heildarvelta á markaði 6,8 milljarðar.
