Tulipop Studios hefur samið við ríkissjónvarpsstöðvarnar Rai á Ítalíu og TF1 í Frakklandi um sýningar á íslensku 52 þátta teiknimyndaröðinni Ævintýri Tulipop.
Um er að ræða virtar sjónvarpsstöðvar með markaðsráðandi stöðu á sínum svæðum og telja því framleiðendur að hinn íslenski Tulipop-ævintýraheimur verði brátt þekktur meðal barna og fjölskyldna á Ítalíu og í Frakklandi.
Þáttaröðin hefur nú verið talsett á átta tungumálum, meðal annars á pólsku, norsku, finnsku, arabísku og frönsku, og er komin í sýningar á YLE í Finnlandi, MBC í Mið-Austurlöndum, Canal+ í Póllandi, Tele-Québec í Kanada, Cartoonito í Bretlandi og Showmax í Suður-Afríku.
Teiknimyndaröðin Ævintýri Tulipop var skrifuð af teymi íslenskra og erlendra handritshöfunda undir stjórn yfirhandritahöfundanna Sara Daddy og Emmu Boucher, sem hafa áður verið yfirhandritahöfundar fyrir Disney og BBC.
Markmið Tulipop er að framleiða teiknimyndir sem eru bæði vandaðar og skemmtilegar, og miðla jákvæðum skilaboðum til barna um vináttuna, fjölbreytileikann og náttúruna.
„Það eru risastór tímamót að fá Rai og TF1 í hóp þeirra sjónvarpsstöðva sem bjóða börnum að horfa á Ævintýri Tulipop. Það er mikill gæðastimpill fyrir okkar teiknimyndaframleiðsluverkefni auk þess sem að samningarnir opna stóra möguleika varðandi frekari vöxt Tulipop-vörumerkisins á þessum mikilvægu evrópsku mörkuðum,“ segir Helga Árnadóttir, framkvæmdastjóri Tulipop og framleiðandi þáttaraðarinnar.
