Fasteignamarkaður lúxuseigna í London stendur frammi fyrir langvarandi niðursveiflu. Verð á dýrustu eignunum hefur lækkað um meira en 20 prósent og allt bendir til að lækkunin eigi enn langt í land.
Viðbótar skattahækkanir á hátekjufólk, brottflutningur erlendra auðmanna og offramboð óseldra eigna eru að ýta undir verðfallið, samkvæmt Bloomberg.
Þótt erlendir fjárfestar hafi í áratugi haldið uppi eftirspurn eftir dýrustu fasteignum borgarinnar eru kaupendur nú færri en áður.
Samkvæmt fasteignasölunni Savills hefur verð á þessum eignum lækkað um 21% frá árinu 2014. Knight Frank mælir 19% lækkun frá hámarki í ágúst 2015.
Eignir eru nú boðnar með verulegum afslætti. Sotheby’s lækkaði nýverið verð á þakíbúð í Mayfair úr 85 milljónum punda niður í 68 milljónir eftir að hafa áður verið auglýst fyrir um 100 milljónir. Samsvarar það um 32% lækkun.
Samkvæmt fasteignamiðluninni LonRes hafa viðskipti með eignir sem eru metnar yfir 5 milljónir punda dregist saman um 15% síðastliðið ár og merki eru um aukningu á nauðungarsölum og eignum í gjaldþrotameðferð.
Stór hluti skýringarinnar felst í nýlegum breytingum á skattkerfi Bretlands.
© epa (epa)
Á þessu ári felldi ríkisstjórnin niður skattalegt ívilnunarkerfi fyrir svonefnda „non-doms“, hátekjufólk sem hefur fasta búsetu erlendis en dvalar- og fjárfestingartengsl við Bretland.
Þetta olli brottflutningi margra auðugra einstaklinga og dró úr hvata til fasteignakaupa. Fjármálaráðuneytið íhugar nú einnig breytingar á erfðafjárskatti, sem hefur aukið óvissu enn frekar.
Charles McDowell, sem hefur lengi sérhæft sig í ráðgjöf við hátekjufólk um fasteignakaup í London, segir að margir snúi sér nú að leigumarkaði í stað kaupa.
„Fólk vill bíða og sjá hver framtíð skattastefnunnar verður áður en það festir rætur,“ segir hann. McDowell hefur nýlega stofnað sérstaka deild sem sinnir aðeins leigum við slíkar aðstæður.
Nokkur helstu verkefni lúxusmarkaðarins þykja nú táknræn fyrir stöðuna.
Í 60 Curzon, byggingu í Mayfair sem var kynnt sem ein sú glæsilegasta í borginni, er aðeins helmingur íbúða seldur, tíu árum eftir að kínverskir fjárfestar tóku þar yfir meirihluta eignarhlutar.
Annað dæmi er The Bryanston við Hyde Park, þar sem aðeins 27 af 54 íbúðum hafa selst á fjórum árum.
„Dýrðardagar London sem miðstöð alþjóðlegs auðs virðast liðin tíð,” segir Paul Finch, sölustjóri hjá Beauchamp Estates. „Hagnaður af lúxusverkefnum er í lágmarki og mörkin milli árangurs og taps hafa aldrei verið þrengri.”
Fasteignasérfræðingar telja að niðursveiflan haldi áfram út árið. Savills spáir allt að 4% viðbótarverðlækkun á þessu ári en aðrir, svo sem Camilla Dell hjá Black Brick, telja að lækkunin geti numið allt að 8–10% áður en árinu lýkur.
Ástandið í London endurspeglar jafnframt alþjóðlega þróun, þar sem hert reglusetning, erfiðara flæði alþjóðlegs fjármagns og hærri vextir hafa dregið úr eftirspurn eftir lúxusíbúðum víða um heim.
