Af þeim þúsundum samlags- og sameignarfélögum sem starfa hér á landi högnuðust hátt í 400 um meira en tíu milljónir króna árið 2022 miðað við áætlun Viðskiptablaðsins. Alls greiddu um það bil fjórtán hundruð félög meira en milljón í tekjuskatt á árinu.
Félögin tíu sem tróna á toppnum högnuðust samtals um ríflega einn og hálfan milljarð og greiddu 2,1 milljarð í laun. Lítið virðist hafa breyst milli ára en upphæðirnar eru nánast þær sömu og þegar Viðskiptablaðið tók saman upplýsingar um félögin fyrir rekstrarárið 2021.
Samanlagður hagnaður hjá þeim 400 félögum sem blaðið tók fyrir í ár nam 9,2 milljörðum króna og launagreiðslur hljóðuðu upp á 10,5 milljarða. Meðalhagnaður nam því tæplega 23 milljónum og meðallaunagreiðslur ríflega 26 milljónum.
Útreikningar blaðsins byggja á álögðum tekjuskatti og gera ráð fyrir flötu 37,6% skatthlutfalli og geta því gefið ranga mynd ef um frávik frá því er að ræða. Til viðbótar við lægra skatthlutfall af þegnum arðgreiðslum er félögunum líkt og öðrum heimilt að yfirfæra tap frá liðnum áratug og draga frá skattstofni.
Þannig kann hagnaður að hafa verið hærri í fyrra en uppgefin tala, en hún endurspeglar þá í slíkum tilfellum meðalafkomu yfir lengra tímabil aftur í tímann en uppgjörsárið í fyrra.
Nánar er fjallað um málið í Viðskiptablaðinu sem kemur út í fyrramálið. Áskrifendur geta lesið fréttina í heild hér.
