Bandarísk hlutabréf hækkuðu við opnum markaða í kjölfar nýrrar vísitölu neysluverðs (CPI) sem jók væntingar um vaxtalækkun hjá Seðlabanka Bandaríkjanna næsta mánuð.
Verðbólga að frádregnum sveiflukenndum liðum í matvæla- og orkugeiranum hækkaði þó og mældist 3,1% í júlí á ársgrundvelli, samanborið við 2,9% í júní, og var örlítið yfir spám hagfræðinga Wall Street Journal.
Hækkunin stafaði að mestu af hærra þjónustuverði, á meðan verð á vörum hélst fremur stöðugt.
Heildarverðbólga mældist 2,7%, sem var lítillega undir væntingum.
Tölurnar styrktu trú fjárfesta á því að Seðlabankinn lækki stýrivexti í september, einkum í ljósi áhyggna af þróun á vinnumarkaði.
Verðbólgutölur dagsins er fyrsta stórtæka útgáfan frá Hagstofu Bandaríkjanna eftir að Donald Trump Bandaríkjaforseti lét víkja forstöðumann stofnunarinnar, Erika McEntarfer, vegna meints misferlis í vinnslu vinnumarkaðsgagna.
Trump hefur tilkynnt að hann hyggist tilnefna hagfræðinginn E.J. Antoni, gagnrýnanda stofnunarinnar, í starfið.
Við opnun vestanhafs hækkaði Dow Jones um 0,91% í 44.376 stig.
S&P 500 hækkaði um 0,58% í 6.410 stig.
Nasdaq hækkaði um 0,61% í 21.515 stig.
Intel hækkaði um 2,08% og hefur nú hækkað þrjá daga í röð eftir fund Trump með forstjóra fyrirtækisins, Lip-Bu Tan.
Ávöxtunarkrafa 10 ára ríkisskuldabréfa fór í 4,31%.
