Bandaríska byggingarvöruverslunin Home Depot birti árshlutauppgjör í morgun en fjárfestar vestanhafs hafa verið að fylgjast náið með uppgjörum stóru smávöruverslananna til að sjá hversu heilbrigður neytendamarkaðurinn er.
Home Depot skilaði 4,5 milljarða dala hagnaði á öðrum ársfjórðungi sem er um 2,1% minni hagnaður en í fyrra. Félagið lækkaði einnig afkomuspána sína fyrir árið um og býst nú við um 3% til 4% samdrætti milli ára í stað 1%.
Hlutabréfaverð félagsins lækkaði um 5% í utanþingsviðskiptum í kjölfar uppgjörs en gengið hefur síðan tekið örlítið við sér.
Að sögn fjármálastjóra félagsins Richard McPhail voru neytendur að forðast stórar framkvæmdir á fjórðungnum, framkvæmdir sem eru oftast fjármagnaðar með lántöku.
„Vöruflokkar sem tengjast baðherbergjum, eldhúsi og gólfklæðningum og öðrum stærri framkvæmdum voru að sjá mesta samdráttinn,“ segir McPhail í uppgjörinu en The Wall Street Journal greinir frá.
Rekstrartekjur félagsins drógust einnig saman milli ára og námu 43,18 milljörðum dala sem er þó betur en spá greiningaraðila sem hljóðaði upp á 42,57 milljarða Bandaríkjadala.
Hlutabréfaverð Lowes, samkeppnisaðila Home Depot, hefur lækkað um 2% í utanþingsviðskiptum í dag en félagið skilar uppgjöri í næstu viku.
