Eldur Ólafsson, forstjóri Amaroq Minerals, segir að öllu óbreyttu muni félagið framleiða gull fyrir árslok samkvæmt árshlutauppgjöri fyrri árshelmings.
Eldur Ólafsson, forstjóri Amaroq Minerals, segir að öllu óbreyttu muni félagið framleiða gull fyrir árslok samkvæmt árshlutauppgjöri fyrri árshelmings.
Heildargreiðslugeta félagsins stendur í 62,2 milljónum Bandaríkjadala eða sem nemur um 8,5 milljörðum króna á gengi dagsins. Mun það vera lækkun úr 96,3 milljónum bandaríkjadala í lok mars.
Um er að ræða reiðufé og ónýttar lánalínur en félagið opnaði þrjár nýjar lánalínur fyrir 35 milljónir dala hjá Landsbankanum í júlímánuði.
Veltufé frá rekstri í gullstarfseminni, að undanskilinni ábyrgð á breytilegum skuldabréfum, nam 50,5 milljónum Bandaríkjadala, þar af fóru 19,6 milljónir Bandaríkjadalir í fyrir fram greiddar verktakagreiðslur í tengslum við Nalunaq-námuna.
„Uppbygging í Nalunaq gengur vel og erum við á góðri leið með að ná markmiðum okkar um framleiðslu á gulli síðar á þessu ári. Við höfum lokið við uppsetningu á aðalmannvirki vinnslusvæðisins og næsta skref er að færa tæki og aðra nauðsynlega hluti inn í bygginguna til uppsetningar. Annar stór áfangi á ársfjórðungnum var að fá samþykki grænlenskra stjórnvalda á umhverfis- og samfélagsmati fyrir Nalunaq-námuna. Við erum staðráðin í að viðhalda hæstu stöðlum umhverfis- og samfélagslegrar ábyrgðar þegar kemur að því að gangsetja framleiðslu í Nalunaq,“ segir Eldur í uppgjörinu.
Samkvæmt uppgjörinu vinna 96 manns við Nalunaq-námuna á hverjum degi en framkvæmdum á svæðinu er að mestu lokið.
Sem fyrr segir býst félagið við því að ná að framleiða gull á fjórða ársfjórðungi þessa árs ásamt því að ljúka aðstöðu fyrir um 120 manns á svæðinu.
„Rannsóknir á frekari auðlindum í Nalunaq og á öðrum álitlegum rannsóknarleyfum félagsins ganga einnig vel. Boranir eru þegar hafnar í Target Block í Nalunaq sem og við nýlega reistar rannsóknarbúðir í Stendalen.
Þá gengum við einnig frá samkomulagi í júlí um helstu skilmála að nýrri lánsfjármögnun við Landsbankann, sem mun auka aðgengi okkar að lánsfé og lengja í núverandi óádregnum lánalínum félagsins. Þessi fjármögnun mun einfalda lánaskipan félagsins í einn samning á hagstæðari kjörum ásamt því að styrkja lausafjárstöðu félagsins,“ segir Eldur.