Hertz á Íslandi tók í byrjun mánaðarins yfir rekstur bílaleigumerkjanna Dollar Rent A Car og Thrifty Car Rental á Íslandi. Vörumerkin Dollar og Thrifty hafa frá árinu 2009 verið starfrækt á Íslandi af Brimborg ehf. en færast nú yfir til Hertz á Íslandi.
„Þessi breyting er í samræmi við stefnu móðurfélagsins og ákvörðun Hertz Global Holdings, sem keypti Dollar Thrifty Automotive Group árið 2012,“ segir í tilkynningu Hertz á Íslandi.
„Við erum gríðarlega ánægð með þessa yfirfærslu og erum spennt fyrir þeim tækifærum sem hún færir okkur,“ segir Sigurður Berndsen, forstjóri Hertz á Íslandi. „Með því að bæta Dollar og Thrifty við okkar vörumerkjafjölskyldu getum við boðið viðskiptavinum enn fjölbreyttari þjónustu og úrval af bílaleigubílum, sem mun styrkja stöðu okkar á markaðnum og sérstaklega til erlendra ferðamanna.“
Bílaleiga Flugleiða ehf., sérleyfishafi Hertz á Íslandi, er í eigu Eggs ehf., móðurfélags bílaumboðsins BL.
Í tilkynningunni þakkar Hertz á Íslandi Brimborg ehf. fyrir framlag þeirra til uppbyggingar Dollar og Thrifty vörumerkjanna á Íslandi.
Fram kemur að allar bókanir sem gerðar hafa verið hjá Dollar og Thrifty fyrir og eftir 1. apríl 2025 muni haldast óbreyttar og engar aðgerðir eru nauðsynlegar af hálfu viðskiptavina.
