Bresk ríkisskuldabréf hafa lækkað nokkuð í verði í dag eftir að Englandsbanki, seðlabanki Bretlands, ítrekaði að hann myndi hætta kaupum á ríkisskuldabréfum á föstudaginn næsta líkt og staðið hefur til.

Ávöxtunarkrafa á 30 ára breskum ríkisbréfum hækkaði um 0,2 prósentustig í dag og er nú komin upp í 5%. Í umfjöllun Financial Times segir að aukinn söluþrýsting á ríkisbréfunum megi m.a. rekja til ummæla breska seðlabankastjórans, Andrew Bailey, sem varaði lífeyrissjóði í gær að þeir hefðu „aðeins þrjá daga eftir og þið verðið að finna út úr þessu“.

Breska landssamband lífeyrissjóða hafði fyrr í vikunni kallað eftir því að kaupáætlun seðlabankans yrði framlengd út mánuðinn eða þar til Kwasi Karteng fjármálaráðherra kynnir áform til að draga úr skuldum ríkisins.

Sjá einnig
Englandsbanki tekur U-beygju

Eftir að fjáraukalög nýrrar ríkisstjórnar Liz Truss voru kynnt í síðasta mánuði féll gengi breska pundsins og krafa ríkisbréfa hækkaði töluvert. Á örfáum dögum hækkaði krafa 30 ára ríkisbréfa úr 3,75% í yfir 5,0% áður en Englandsbanki greip inn í þann 28. september síðastliðinn. Krafan snarlækkaði í kjölfarið og fór undir 4% en er nú aftur komin upp í 5%.

„Það sem gerðist í breska lífeyriskerfinu [] á rætur að rekja til skarprar hækkunar á ávöxtunarkröfu bresku ríkisskuldabréfanna sem var viðbragð markaðarins við áformum ríkisstjórnarinnar. Lífeyrissjóðirnir þurftu að bregðast við með því að selja skuldabréf til að geta mætt veðköllunum,“ sagði Jón Daníelsson, prófessor í hagfræði við LSE, við Viðskiptablaðið í síðustu viku.

Sjá einnig
Ekki nóg að þekkja allar nóturnar í sónötunni

Frá því að Englandsbanki tilkynnti um stórtæk kaup á ríkisbréfum hefur hann auk þess hækkað hámarkskaup á einum degi og byrjað að kaupa verðtryggð ríkisbréf til að reyna að koma í veg fyrir brunasölu hjá lífeyrissjóðum.

Seðlabankinn hefur nýtt um 9 milljarða punda af 65 milljarða punda kaupheimild sinni, að því er kemur fram í frétt FT.