Landsvirkjun og Jarðboranir hafa samið um borun tveggja rannsóknarhola á Þeistareykjum sumarið 2023. Boranirnar eru liður í undirbúningi Landsvirkjunar fyrir stækkun Þeistareykjavirkjunar til að mæta aukinni orkuþörf á Norðausturlandi.
Þeistareykjastöð var gangsett á árunum 2017-2018 en Landsvirkjun segir að rekstur stöðvarinnar hafi gengið afar vel. Uppsett afl hennar er 90 MW. „Kolefnisspor virkjunarinnar er með því lægsta sem þekkist í jarðvarmavirkjunum,“ segir í fréttatilkynningu.
Landsvirkjun kannar nú möguleika á að veita koldíoxíði úr borholum á svæðinu aftur ofan í jarðhitageyminn, þaðan sem það á uppruna sinn.
Rafmagnsbor notaður í fyrsta sinn
Landsvirkjun hefur nú hafið að nýju athuganir á möguleikum á stækkun virkjunarinnar og er borun tveggja rannsóknarhola mikilvægur þáttur.
„Jarðboranir munu leggja til verksins borinn Þór, nýjasta og fullkomnasta bor fyrirtækisins. Stefnt er að því að bora holurnar með rafmagni frá Þeistareykjastöð sem sparar notkun á nokkur hundruð þúsund lítrum af jarðefnaeldsneyti. Borframkvæmdin sjálf er því mikilvægur þáttur í að lækka enn frekar kolefnisspor virkjunarinnar.“
Sjá einnig: Kaupa helmingshlut í Jarðborunum á 1,1 milljarð
Þetta verður í fyrsta sinn sem jarðhitaholur á vegum Landsvirkjunar eru boraðar með rafmagnsbor. Lagðir hafa verið háspennustrengir um Þeistareykjasvæðið til að auðvelda þá vinnu.
