Samkvæmt árshlutauppgjöri Landsbankans er bankinn með það til skoðunar að hefja á fjórða ársfjórðungi opið söluferli á 47,9% eignarhlut bankans í Greiðslumiðlun Íslands ehf., sem meðal annars á dótturfélagið Motus.
Eignarhaldsfélögin Bál ehf. og Solvent ehf., fara með 52,08% eignarhlut í Greiðslumiðlun Íslands, en félögin tvö eru í meirihlutaeigu sjóðs í rekstri Alfa Framtaks ehf.
Alfa Framtak festi kaup á meirihluta hlutafjár í eignarhaldsfélögunum tveimur árið 2019 en félögin höfðu þá áður verið í fullri eigu stjórnenda GMÍ.
Greiðslumiðlun Íslands hagnaðist um 75,2 milljónir í fyrra samkvæmt ársreikningi og var eigið fé samstæðunnar í lok árs í fyrra 1,43 milljarðar króna. Mun það vera tæplega helmingslækkun úr 158 milljón króna hagnaði árið 2022.
Stjórn GMÍ lagði til að greiddur yrði úr 225 milljón króna arður til hluthafa í ár vegna rekstrarársins í fyrra.
Tekjur samstæðunnar í fyrra námu 2 milljörðum króna. Dótturfélög GMÍ eru Motus ehf., Greiðslumiðlun ehf., Slæður ehf., Lausafé ehf. og Faktoría ehf.
Um 76 stöðugildi voru hjá samstæðunni að meðaltali í fyrra.
