Tæplega 8,5 milljónir farþega munu ferðast um Keflavíkurflugvöll (KEF) á næsta ári sem er 9,6% aukning frá þeim 7,74 milljónum sem fara um flugvöllinn í ár.
Þetta kemur fram í farþegaspá Isavia fyrir árið 2024 en spáin gerir ráð fyrir því að tæplega 2,4 milljónir erlendra ferðamanna komi til landsins um flugvöllinn.
Gangi spáin eftir verður árið 2024 það þriðja stærsta í sögu Keflavíkurflugvallar og það stærsta í komu erlendra ferðamanna til Íslands. Aðeins tvisvar hafa farþegarnir verið fleiri, 8,8 milljónir 2017 og 9,8 milljónir 2018.
Yfir sumarmánuðina munu 25 flugfélög fljúga áætlunarflug til 82 áfangastaða og 20 flugfélög til 69 áfangastaða yfir vetrarmánuðina.
Spáin gerir ráð fyrir að hlutfall tengifarþega verði um 30% af heildarfarþegafjölda á næsta ári en til samanburðar er það um 27% í ár.
Það þýðir að hærra hlutfall af heildarfarþegafjölda mun nýta Keflavíkurflugvöll sem tengistöð án þess að dvelja á Íslandi. Hlutfall tengifarþega fór mest árið 2018 þegar það var um 40%.
„Við hlökkum til að taka á móti fleiri gestum á næsta ári. Við höfum fjárfest í þróun flugvallarins undanfarin ár og það er byrjað að skila sér í bættri aðstöðu fyrir farþega og starfsfólk,“ segir Guðmundur Daði Rúnarsson, framkvæmdastjóri viðskipta og þróunar hjá Isavia.
„Spáin bendir einnig til þess að fjölgun farþega, sem og erlendra ferðamanna, verði hlutfallslega meiri en áður yfir vetrarmánuðina en sumarmánuðina. Það mun styðja við betri og jafnari nýtingu á flugvellinum yfir allt árið og á innviðum ferðaþjónustunnar.“
