Þórdís Kolbrún Reykfjörð Gylfadóttir, varaformaður Sjálfstæðisflokksins, hefur ákveðið að gefa ekki kost á sér til formanns eða annarra embætta innan Sjálfstæðisflokksins á komandi landsfundi í febrúar.
Hún segist stolt af því að hafa verið varaformaður síðustu sjö ár og að hafa verið í forystu flokksins með Bjarna Benediktssyni.
„Á þeim tímamótum sem flokkurinn er á núna er eðlilegt að þær raddir sem kallað hafa hæst á endurnýjun fái tækifæri til þess að reyna sig og flokkurinn fái að velja nýja forystu. Ég sækist því ekki eftir formennsku eða öðru embætti á næsta landsfundi,” skrifar Þórdís.
„Ég tek þessa ákvörðun með hjartanu og á þessum tímamótum lít ég inn á við og spyr sjálfa mig hvernig ég geti best gert gagn. Þá er gott að vera umkringd væntumþykju og kærleika fjölskyldu og vina. Börnin mín og eiginmanns sem jarðtengja mig, mömmu og pabba, bræður, mágkonur, tengdaforeldra, frænkur, frændur og vini,” bætir Þórdís við.
Hún segist hlakka til þess að vera óbreyttur þingmaður á eigin forsendum og hluti af liði.
„Í öflugum þingflokki með nýju og framúrskarandi fólki sem hlakkar til að spreyta sig og vaxa í nýju hlutverki. Ég hlakka til að vera frjálsari, fá meiri tíma til að lesa bækur og skrifa, rækta það að hafa skynbragð og skilning á því sem er að gerast í kringum okkur, og veldur mér raunverulegum áhyggjum.
Því miður grunar mig að það sé allt miklu stærra en einungis innanlandsmál, hvað þá innanflokksmál,” skrifar Þórdís.
Í færslunni segist Þórdís lofa því að leggja sig fram við að hlusta, læra og nýta dómgreind sína og hugmyndir í samræmi við eigin samvisku en ávallt með þeim hætti að heildarhagsmunir samfélagsins ráði för.
Hægt er að lesa færsluna í heild hér að neðan.
