Opinbert tilboðsyfirlit vegna yfirtökutilboðs Langasjós, sem á meðal annars Ölmu íbúðafélag og fjárfestingarfélagið Brimgarða, í allt hlutafé Eikar barst hluthöfum í morgun.
Tilboðsverðið er 11 krónur fyrir hvern hlut í Eik sem greiðast munu í reiðufé fimm virkum dögum eftir að gildistíma yfirtökutilboðsins lýkur, þann 18. október.
Opinbert tilboðsyfirlit vegna yfirtökutilboðs Langasjós, sem á meðal annars Ölmu íbúðafélag og fjárfestingarfélagið Brimgarða, í allt hlutafé Eikar barst hluthöfum í morgun.
Tilboðsverðið er 11 krónur fyrir hvern hlut í Eik sem greiðast munu í reiðufé fimm virkum dögum eftir að gildistíma yfirtökutilboðsins lýkur, þann 18. október.
„Hæsta verð sem einhver samstarfsaðila hefur greitt fyrir hlutabréf í Eik á síðustu sex mánuðum fyrir dagsetningu þessa tilboðsyfirlits nemur kr. 11,2 fyrir hvern hlut,” segir í tilboðsyfirlitinu.
Langisjór keypti í lok ágúst 6 milljónir hluta í Eik fasteignafélagi auk þess að taka við 442 milljónum hluta frá dótturfélagi sínu Brimgörðum.
Samkvæmt tilboðsyfirlitinu á Langisjór og samstarfsaðilar þess 1.106.281.964 hluti í dag, sem samsvarar 32,31% af heildaratkvæðisrétti í Eik.
Langisjór er í eigu systkinanna Eggerts Árna, Guðnýjar Eddu, Gunnars Þórs og Halldórs Páls Gíslabarna sem oft eru kennd við heildverslunina Mata.
Heildartekjur samstæðu Langasjávar á árinu 2023 námu 15,75 milljörðum króna og nam EBITDA samstæðunnar 3,63 milljörðum króna.
Langisjór er því afar nálægt því að eignast 34% hlut en við það þarf fjárfestingafélagið að samþykkja allar stærri ákvarðanir Eikar svo þær fái brautargengi.
Tilgangur Langasjávar með framlagningu yfirtökutilboðsins er að eignast meirihluta hlutafjár Eikar og viðhalda skráningu hlutabréfa félagsins á aðalmarkaði Nasdaq Iceland.
„Umbreytingarferli er fram undan til að straumlínulaga reksturinn með það í huga að leggja áherslu á arðsemi hlutafjár umfram vöxt. Með ráðandi eignahlut verður skilvirkara að ráðast í aðgerðir sem hafa jákvæð áhrif á arðsemi félagsins til lengri tíma litið.“
Félagið og samstarfsaðilar þess eignuðust þannig meira en 30% atkvæðisrétt í Eik og hefur myndast tilboðsskylda, samkvæmt lögum um yfirtökur.
Í framtíðaráætlunum kemur fram að félagið hafi í hyggju að „straumlínulaga“ eignasafn félagsins, eftir atvikum með sölu eigna, í því skyni að ná fram betri heildararðsemi fjárfestingasafnsins.
Andvirði af sölu slíkra eigna verður nýtt til arðgreiðslu til hluthafa eða endurkaupa á eigin hlutum.
Langisjór leggur til að Eik verði eftirleiðis arðgreiðslufélag sem greiði hluthöfum árlega arðgreiðslu sem samsvarar að jafnaði ekki lægra hlutfalli en 75% af handbæru fé frá rekstri næstliðins árs.
Auka skuldsetningu og arðsemi
Samkvæmt áætlunum félagsins verður stefnt að því að auka skuldsetningu til að auka arðsemi eigin fjár félagsins án þess þó að stefna fjárhagslegum stöðugleika þess í hættu.
Langisjór leggur einnig til að hlé verði gert á frekari uppbyggingu Eikar á safni atvinnueigna og að könnuð verði kostgæfni þess að Eik sinni uppbyggingu og útleigu íbúðarhúsnæðis til almennings að norrænni fyrirmynd.
Félagið vill einnig að áherslum í fasteignaþróunarverkefnum Eikar verði breytt á þann veg að félagið einbeiti sér eingöngu að þróun fasteignaverkefna til endursölu í aðdraganda byggingarframkvæmda.
Langisjór telur nauðsynlegt að endurskoða rekstur Eikar til að auka ráðdeild og arðsemi rekstrarins.
