Markaðsviðburður Póstsins var haldinn í Silfurbergi í Hörpu í gær og segir í tilkynningu að viðburðurinn hafi verið fjölsóttur.
Gestir, margir hverjir verslunar- og fyrirtækjaeigendur, voru mættir til að virða að sér fróðleik um vænlegar leiðir til árangurs í markaðsmálum.
Ósk Heiða Sveinsdóttir, framkvæmdastjóri viðskiptavina hjá Póstinum, stýrði viðburðinum. Fyrirlesarar voru þau Bára Atladóttir, Arinbjörn Hauksson, Ágúst Óli Sigurðsson og Auður Ösp Ólafsdóttir.
Bára Atladóttir, hönnuður og eigandi BRÁ verslunar, var óspör á söluaukandi ráð til verslunareigenda. Hún stóð til dæmis frammi fyrir því að vera með lager fullan af pallíettukjólum í samkomubanni en tókst að fimmfalda sölu með því að bregða á leik á samfélagsmiðlum undir myllumerkinu #bráfancyfriday.
Ágúst Óli hjá Svartagaldri tíundaði mikilvægi þess að nýta gögnin vel. Hann nefndi einnig að það mætti fá innblástur með því að nýta gervigreindina svo sem í tengslum við uppsetningu og sköpun en vélanám er líka gagnlegt til að finna sinn markhóp og vísar til algrímsins á samfélagsmiðlum.
Auður Ösp, markaðsklappstýra, eins og hún kallar sig, velti fyrir sér mannlega vinklinum á tímum gervigreindar. Sjálf segist hún nota slíka tækni á hverjum degi en slær varnagla við að stóla alfarið á hana.
Arinbjörn, forstöðumaður markaðssviðs ELKO, segir fyrirtækið leggja ríka áherslu á ánægju viðskiptavina sem felst meðal annars í því að viðskiptavinir njóti góðs af því að byrja snemma að versla jólagjafir og boðið sé upp á góðan skilarétt. Þá sé líka mikilvægt að manna starfstöðvar vel því álagið eykst til muna á afsláttardögunum að hans sögn.
