Setning Mentorverkefnis FKA Framtíðar 2024-2025 fór fram fimmtudaginn 17. október í nýjum höfuðstöðvum Securitas.
Viðburðurinn markar upphaf spennandi samstarfs þar sem konur úr ólíkum atvinnugeirum fá tækifæri til að efla sig bæði persónulega og faglega með aðstoð reynslumikilla leiðtoga úr atvinnulífinu.
Í tilkynningu segir að metaðsókn hafi verið í verkefnið síðustu ár en þátttakendur telja um 160 konur.
„Maður fær stjörnur í augun yfir þessum öflugu og flottu konum sem eru tilbúnar að gefa tímann sinn til að hjálpa öðrum konum að ná lengra,“ segir Kristín Amy Dyer, formaður FKA Framtíðar.
„Ein fljótlegasta leiðin til að efla sig í lífi og starfi er að læra af reynslu annarra, og þar koma mentorar sterkir inn," bætir Kristín við.
Á dagskrá hverrar setningar Mentorverkefnisins er haldið hraðstefnumót þar sem mentor og mentee kynna sig í einnar mínútu lyfturæðu. Þessi kynni leggja grunninn að því að tvær konur verða paraðar saman í kjölfarið fyrir formlegt samstarf sem hefst á næstu mánuðum.
Guðrún Inga Guðlaugsdóttir, framkvæmdastjóri mannauðs og menningar hjá Securitas, lagði áherslu á mikilvægi mannauðsstjórnunar í nútímasamfélagi og hlutverk leiðtoga í því að styðja við starfsþróun einstaklinga innan skipulagsheilda.
Ása Karín Hólm, verndari mentorverkefnisins 2024-2025, tók einnig til máls og ræddi mikilvægi þess að byggja upp sterkt tengslanet og varpaði ljósi á að fleiri stór fyrirtæki hafi innleitt mentorverkefni innanhúss hjá sér.
Securitas bauð upp á léttar veitingar og fengu þátttakendur tækifæri til að mynda tengsl og eiga innihaldsrík samtöl í notalegu andrúmslofti.
