Origo hélt morgunverðarfund í síðustu viku sem bar heitið „Ofurkraftar gervigreindar“. Á fundinum var lögð áhersla á það hvernig örugg gögn geta leyst krafta gervigreindar úr læðingi.
Fjölbreyttur hópur innlendra og erlendra sérfræðinga hélt erindi á þessum uppselda viðburði um áskoranir og tækifæri sem felast í heimi gervigreindar í umhverfi fyrirtækja.
Niðurstöður alþjóðlegra kannana sýna að stjórnendur treysta á að gervigreind muni gegna lykilhlutverki næstu þrjú árin.
„Fyrirlesararnir lögðu allir ríka áherslu á að margt þyrfti að varast þegar kemur að notkun gervigreindarlausna. Má þar nefna áhættuna sem stafar af því að nota gervigreindarlausnir sem eru opnar og í því sambandi var Samsung-sagan nefnd, en starfsmaður fyrirtækisins setti viðkvæmar upplýsingar í hugsunarleysi inn í slíka lausn. Í kjölfarið bannaði Samsung notkun allra opinna gervigreindarlausna hjá starfsmönnum sínum,“ segir í tilkynningu.
Á fundinum var einnig sagt að fyrirtæki telji oft að starfsmenn þeirra séu ekki að nýta gervigreind í störfum sínum þar sem stefnumótandi ákvörðun hefur ekki verið tekin um ákveðin gervigreindarverkefni né hvaða lausnir skal nota. Kannanir sýna hins vegar að allt að 50% starfsmanna nýti slíkar lausnir í daglegum störfum.
