Heilbrigðistæknifyrirtækið Helix stóð fyrir viðburði í Hannesarholti í síðustu viku þar sem fjallað var um stöðu og þróun heilbrigðistækni á Íslandi.
Á dagskránni voru erindi frá leiðandi sérfræðingum og frumkvöðlum á sviði heilbrigðistækni sem deildu innsýn sinni og reynslu með gestum.
Þau ræddu m.a. um árangur sem þegar hefur náðst með innleiðingu hugbúnaðarlausna í heilbrigðiskerfinu og hvar helstu tækifæri framtíðarinnar liggja.
Jón Magnús Kristjánsson, aðstoðarmaður heilbrigðismálaráðherra, opnaði viðburðinn og fór yfir stöðu og stefnu stjórnvalda í heilbrigðistæknimálum á Íslandi.
Sandra Mjöll Jónsdóttir Buch hjá Fönn Consulting kynnti niðurstöður nýrrar greiningar á stöðu heilbrigðis- og lífvísindageirans á Íslandi. Í erindi sínu lagði hún áherslu á mikilvægi þess að skapa stuðningsumhverfi fyrir áframhaldandi þróun og nýsköpun í geiranum.
Hulda Hallgrímsdóttir, framkvæmdastjóri Nox Medical/Nox Health, sagði frá alþjóðlegri vegferð Nox og lýsti hvernig vottuð stafræn meðferðarúrræði eru að gegna sífellt stærra hlutverki í svefnmeðferð á heimsvísu.
Kjartan Þórsson, stofnandi Prescriby, deildi reynslusögu fyrirtækisins sem hefur þróað lausnir sem leysa alvarleg klínísk vandamál innan heilbrigðiskerfisins.
Einar Geirsson, forstöðumaður nýsköpunar hjá Helix ræddi síðan að lokum um mikilvægi þess að endurhugsa fyrirkomulag tímabókana í íslenska heilbrigðiskerfinu. Hann sagði slíkar breytingar geta valdeflt sjúklinga til að taka virkari þátt í eigin meðferð.
„Það er ljóst að heilbrigðistækni á Íslandi er svo sannarlega í vexti og við getum verið stolt af þeirri grósku sem á sér stað hér. Við höfum náð langt með þeim fjölmörgu lausnum sem hafa þróast hér og við getum verið bjartsýn á að byggja upp heilbrigðiskerfi framtíðarinnar,“ sagði Arna Harðardóttir, framkvæmdastjóri Helix, sem stóð að viðburðinum að erindum loknum.
Erla Tinna Stefánsdóttir, viðskiptastjóri á iðnaðar- og hugverkasviði Samtaka iðnaðarins, stýrði fundinum og ræddi um þróun heilbrigðistæknimála og stefnu stjórnvalda við lok fundar.
