Það hefur aldrei verið jafn mikil þörf á sjálfbærni í tískuheiminum og nú. Hraðtíska, eða „fast fashion,“ er gríðarlega mengandi, mikið magn fatnaðar endar á urðunarstöðum og mikil orka fer í framleiðslu á ódýrum fötum sem oft eru ekki endurunnin.
En hvernig getum við byggt upp sjálfbæran fataskáp án þess að fórna stílnum? Hér eru nokkur einföld skref til að skapa fataskáp sem er bæði tímalaus og vistvænn.
Veldu tímalausar flíkur
Tímalaus hönnun, einföld snið og gæði standa alltaf fyrir sínu. Þegar þú fjárfestir í klassískum flíkum, eins og fallegri ullarpeysu, flottum leðurjakka eða gallabuxum sem passa fullkomlega, ertu að byggja upp grunn sem þú munt geta notað í mörg ár. Slíkar flíkur eru oft gerðar úr gæðaefnum og slitna því síður. Gæði frekar en magn er lykilatriði þegar kemur að sjálfbærni.
Kauptu minna
Eitt mikilvægasta skrefið til að vera með sjálfbæran fataskáp er að forðast óþarfa kaup. Spyrðu þig, áður en þú kaupir flík: „Er þetta eitthvað sem ég þarf?“ og „Hvernig mun þetta passa við það sem ég á nú þegar?“ Með því að velja flíkur sem passa saman og eru fjölnota, geturðu gert meira úr færri flíkum. Það að fjárfesta í nokkrum hágæða flíkum frekar en mörgum ódýrum styður ekki bara við sjálfbærni heldur einnig við að þú upplifir þig alltaf vel klædda.
Kaupðu notað
Þegar þú kaupir notaðar flíkur, ertu ekki aðeins að spara peninga heldur einnig stuðla að sjálfbærari neyslu. Verslanir með notaðar flíkur bjóða upp á fjölbreytt úrval af einstökum flíkum og oft er hægt að finna fágætar gersemar sem enginn annar á. Hvort sem þú finnur föt í gegnum netið, samfélagsmiðla eða í vintage verslunum, býður þetta upp á aðra möguleika en stóru keðjurnar.
Skiptu á fötum við vini eða á skiptimörkuðum
Fataskiptimarkaðir og vinahópar sem skipta á fötum hafa rutt sér til rúms sem frábær leið til að prófa nýja stíla án þess að versla nýjar flíkur. Þannig getur þú losað þig við föt sem þú notar ekki og fengið flíkur sem þú munt kannski elska. Þetta er líka góð leið til að prófa fleiri liti eða snið sem þú ert ekki viss um, án þess að skuldbinda þig til að kaupa nýtt.
Veldu vistvæn efni
Ef þú kaupir nýjar flíkur, skoðaðu þá innihaldsefni þeirra. Náttúruleg efni eins og lífræn bómull, ull og hör hafa oft minni umhverfisáhrif en gerviefni, en einnig er mikilvægt að hugsa um endingu. Einnig eru sífellt fleiri vörumerki að framleiða fatnað úr endurunnum efnum eða umhverfisvænum hráefnum eins og Tencel eða bambus.
Láttu laga frekar en að henda
Mörg okkar henda fötum of auðveldlega vegna smávægilegra bilana eða slita. Að láta lappa upp á uppáhaldsflíkina þína, sauma aftur hnapp eða laga rifna sauma getur sparað þér ótrúlega mikið til lengri tíma litið. Hugsaði auk þess vel um flíkurnar þínar; með því að fylgja þvottaleiðbeiningum og geyma flíkur rétt. Þannig geturðu aukið endingartíma þeirra.
