Bandaríski sjóðsstjórinn Bill Ackman hvetur bandarísk stjórnvöld til að afskrifa nær 200 milljarða dala kröfu sína á fasteignalánarisana Fannie Mae og Freddie Mac, komi til þess að félögin verði aftur einkavædd.
Að öðrum kosti telur hann framtíð þeirra sem einkafyrirtækja vera í uppnámi, samkvæmt Financial Times.
Ackman, sem stýrir vogunarsjóðnum Pershing Square, er meðal þeirra fjárfesta sem keyptu hlutabréf í Fannie og Freddie í þeirri von að félögin yrðu tekin úr ríkisumsýslu (e. conservatorship) á endanum með tilheyrandi hagnaði fyrir hluthafa.
Fannie Mae og Freddie Mac voru færð undir stjórn bandaríska ríkisins í kjölfar fjármálakreppunnar árið 2008.
Ríkið lagði félögunum til um 200 milljarða dala í neyðarfjármögnun en leyfði engu að síður áfram viðskipti með hluta- og forgangsbréf þeirra á markaði.
Sú ákvörðun leiddi til þess að þó nokkrir áhættufjárfestar keyptu í félögunum í von um að þau myndu endurheimta stöðu sína og skila arði.
Félögin tvö hafa náð vopnum sínum aftur og hefur bandaríska ríkið fengið um 300 milljarða dala í arðgreiðslur og aðrar tekjur frá þeim.
Vill afskriftir til að bæta virði félaganna
Í nýlegri og ítarlegri kynningu sem FT fjallar um heldur Ackman því fram að markaðsvirði Fannie og Freddie gæti numið allt að 35 dölum á hlut eftir að félögin hafa verið endurskipulögð og tekin til almenns hlutafjárútboðs. Metur Ackman þannig virði félaganna um þrefalt hærra en núverandi markaðsverð.
Það sem stendur í vegi, að hans mati, eru forgangsbréf að andvirði um 200 milljarða dala sem bandaríska ríkið á enn í félögunum.
Ef þeim væri breytt í almenn hlutabréf myndi það þynna verulega út hlut einkafjárfesta eins og Ackmans.
Hann leggur því til að ríkið lýsi forgangskröfu sinni þegar greiddri og falli frá frekari tilkalli.
Að öðrum kosti muni erfitt reynast að skapa traust meðal nýrra fjárfesta í félögum sem hafi ekki virt rétt fyrri hluthafa. Að mati Ackman gæti það endað í löngum málaferlum ákveði ríkið að breyta kröfum sínum í hlutabréf.
Fjölda spurninga er enn ósvarað um hvernig útfæra eigi útgöngu Fannie og Freddie úr ríkisumsýslu, samkvæmt FT, en til að mynda er enn deilt um hversu hátt eiginfjárhlutfall þeirra á að vera svo þau geti staðið af sér áföll.
Stjórnvöld í Washington eiga enn eftir að ákveða hvort fasteignalánarisarnir eigi að vera með sömu eiginfjárhlutöll og bankar eða hærra.
Samkvæmt FT eru stjórnvöld vestanhafs ekkert að flýta sér enda skila félögin enn gríðarlegum arði á meðan unnið er að einkavæðingunni.
