Það kom mörgum í opna skjöldu þegar olíuverð lækkaði samhliða því að ástandið í Miðausturlöndum versnaði.
Samkvæmt ítarlegri greiningu Financial Times var söluþrýstingur olíufjárfesta knúinn áfram af opinberum upplýsingum, greiningum og samfélagsmiðlafærslum.
Þegar Íran hóf eldflaugaárás á bandarískan herflugvöll í Katar síðdegis á mánudag héldu margir að olíuverð myndi hækka líkt og hefð er þegar spenna eykst fyrir botni Miðjarðarhafs.
En innan sjö mínútna eftir fyrstu skot fór olíuverð að lækka og innan 20 mínútna hafði Brent hráolían lækkað um 3%.
Við lokun markaða hafði verð lækkað um 7,2% og stóð í 71,48 bandaríkjadölum, mestu dagslækkun í nærri þrjú ár.
Viðbrögð markaðarins áttu rætur að rekja til ítarlegrar greiningar olíukaupmanna á gögnum úr opnum upplýsingaveitum, þar á meðal gervitunglamyndum og færslum á samfélagsmiðlum, samkvæmt FT.
Greiningar sýndu að bandarískar hersveitir höfðu flutt þotur frá Al Udeid-flugstöðinni í Katar fyrir árásina á íransk kjarnorkumannvirki helgina áður og að eldflaugaskotin væru fyrst og fremst táknræn viðbrögð, ekki undanfari víðtækari átaka.
„Við höfum séð þessa mynd áður,“ skrifaði Jorge Montepeque, sérfræðingur á olíumarkaði hjá Onyx Capital, í skilaboðum til viðskiptavina skömmu eftir árásina.
Hann taldi ljóst að skotmörkin væru mannlaus og viðbrögðin fyrir fram ákveðin til að draga úr spennu, ekki magna hana.
Fjárfestar á hrávörumörkuðum hafa í síauknum mæli lært að aðgreina tímabundna áhættu frá raunverulegum framboðsáföllum.
Í þessu tilviki var ljóst að flæði olíu og gass frá svæðinu væri áfram óraskað og í raun jókst olíuflutningur Írans samkvæmt gögnum orkuráðgjafafyrirtækisins Rystad.
Markaðsverð á olíu hafði einnig brugðist svipað viku fyrr þegar Ísrael réðst á íranskar olíuhreinsunarstöðvar. Olíuverð hækkaði um 5,5% en sú hækkun hvarf þegar merki bárust um að Íran hefði áhuga á friðarviðræðum.
„Þetta snýst allt um Hormússundið. Þegar ljóst varð að engin hætta væri á að því yrði lokað hvarf áhættuálagið nánast samstundis,“ sagði Amrita Sen, stofnandi markaðsgreiningarfyrirtækisins Energy Aspects.
Þrátt fyrir að átökin milli Ísraels og Írans vöktu mikla athygli á mörkuðum var olíuverð áfram undir þrýstingi vegna ofgnóttar framboðs.
OPEC+ ríkin hafa aukið framleiðslu og bandarískir olíuframleiðendur halda enn uppi metframleiðslu. Því töldu greiningaraðilar og olíufjárfestar að til lengri tíma litið gæti verð lækkað niður í 50–60 dali tunnan.
Þegar fréttir bárust af vopnahléi á milli Ísraels og Írans, með milligöngu Donalds Trump Bandaríkjaforseta, lækkaði Brent-olían um önnur 6,1% og fór undir það verð sem gilti fyrir átökin.
Sveiflur markaðarins jukust einnig vegna afleiðuviðskipta, sérstaklega vegna valréttarsamninga með sölurétt sem sumir framleiðendur höfðu keypt til að verja sig gegn verðlækkun.
Þegar markaðurinn færðist nær þeim viðmiðum leiddu afleiðuviðskiptin til þess að fjöldi fór að selja framvirka samninga sem ýtti enn frekar undir lækkun.
„Það varð með öðrum orðum kapphlaup upp og svo kapphlaup niður,“ sagði Al Munro, miðlari hjá Marex.
