Nýsköpunarfyrirtækið Álvit hefur tryggt sér tæplega 50 milljón króna fjármögnun frá Nýsköpunarsjóðnum Kríu og hópi englafjárfesta.
Fjármagnið verður nýtt til þess að markaðssetja fyrstu vöru fyrirtækisins auk þess að undirbúa að sækja frekari vaxtarfjármögnun á komandi mánuðum.
Fjárfestahópurinn inniheldur fjáfestingafélagið FnF - sem er í eigu hjónanna Guðmundar Fertrams Sigurjónssonar, stofnanda Kerecis, og Fanneyjar Hermannsdóttur – Dr. Sigurjón Ólafsson, efnafræðing og prófessor emeritus, Dr. Kristínu Friðgeirsdóttur, prófessor við London Business School og fyrrverandi fjármálastjóra Sýnar, Gunnlaug Árnason, framkvæmdastjóra hjá Arctic Therapeutics, auk félags í eigu Úlfars Schaarup Hinrikssonar, eiganda Suzuki á Íslandi.
Samhliða fjárfestingunni hafa Kristín og Gunnlaugur tekið sæti í stjórn Álvits, Kristín sem stjórnarformaður.
Leysa koltjörubikið af hólmi
Álvit var stofnað árið 2020 af frumkvöðlunum Sunnu Ólafsdóttur Wallevik, forstjóra félagsins, Dr. Sigrúnu Nönnu Karlsdóttur, framkvæmdastjóra vísinda- og rannsóknarsviðs, og Dr. Kristjáni Friðriki Alexanderssyni, framkvæmdastjóra vöruþróunar. Þau stofnuðu einnig ráðgjafafyrirtækið Gerosion.
Álvit hefur fullþróað umhverfisvænan kragasalla til að leysa af hólmi kragasalla bundinn með koltjörubiki (e. coal tar pitch) sem rannsóknir hafa sýnt fram á að sé bæði heilsuspillandi og krabbameinsvaldandi. Árið 2020 var koltjörubik sett á bannlista Efnafræðistofnunar Evrópu (ECHA) vegna losunar á krabbameinsvaldandi PAH efnum.
Félagið segir mikla þörf á nýrri kragasalla lausn þar sem kragasalli er notaður í návígi við starfsfólk álvera. Lausn Álvits sé fyrsta umhverfisvæna varan sem geti komið alfarið í staðinn fyrir kragasalla bundinn með koltjörubiki.
Markaðurinn fyrir koltjörubik á heimsvísu nemur um 650 milljörðum króna. Álframleiðslufyrirtæki eru stærstu notendur koltjörubiks í formi kragasalla, en um 45% af öllu koltjörubiki er notað við álframleiðslu.
Rannsóknir Álvits gefi einnig sterklega til kynna notkunarmöguleika á nýja háhita og tæringaþolna varnarefninu í geirum þar sem ekki hefur tekist að þróa öruggan arftaka koltjörubiks, t.d. húðun á viðkvæmum íhlutum í orkufrekum iðnaði og jarðvarmageiranum.
„Við erum þakklát nýjum fjárfestum, Rannís og Tækniþróunarsjóði fyrir að gera okkur kleift að fullþróa lífræna lausn sem hefur sömu eignileika og koltjörubik,” segir Dr. Kristján Friðrik Alexandersson, framkvæmdastjóri vöruþróunar og meðstofnandi Álvits.
„Það sem gerir nýju lausnina einstaklega spennandi kost er ekki bara það að hún losar ekki frá sér nein heilsuspillandi efni, heldur er hún líka framleidd úr endurnýjanlegu hráefni, á meðan koltjörubik er aukaafurð úr vinnslu á kolum.“
