Viðskipti með hluti í líftæknilyfjafyrirtækinu Alvotech hófust í dag á Nasdaq-markaðnum í Stokkhólmi. Félagið verður skráð undir auðkenninu ALVO SDB, en SDB (Swedish Depository Receipts) eru sænsk heimildarskírteini sem jafngilda hlutabréfum í félaginu.
Skráningin í Svíþjóð er liður í stefnu félagsins um að auka sýnileika á alþjóðlegum mörkuðum, með sérstakri áherslu á Skandinavíu og Evrópu.
Jafnframt er markmiðið að auka viðskipti með hluti í félaginu og fjölga hluthöfum. Með skráningunni verður Alvotech skráð samtímis á þremur aðalmörkuðum Nasdaq; í Bandaríkjunum, á Íslandi og nú í Svíþjóð.
„Við lítum á skráninguna í Stokkhólmi sem þjónustu við núverandi hluthafa eða þá sem hyggjast fjárfesta í félaginu og að hún muni stuðla að auknum viðskiptum með bréf í félaginu. Hlutabréfamarkaðurinn í Stokkhólmi er einn sá stærsti í Evrópu, sérstaklega í viðskiptum með bréf fyrirtækja í heilbrigðisgeiranum. Skráning Alvotech á Nasdaq í Stokkhólmi mun stuðla að því að breiðari hópur markaðsaðila í Skandinavíu og Evrópu sem fjárfesta í líftækni- og lyfjafyrirtækjum kynnist Alvotech og geti fjárfest í félaginu. Viðbrögð markaðsaðila sem við höfum fundað með að undanförnu og umframeftirspurn í útboðinu sem lauk í síðustu viku, bendir til mikils áhuga,“ sagði Róbert Wessman, stjórnarformaður og forstjóri Alvotech.
Í aðdraganda skráningarinnar stóð Alvotech fyrir hlutafjárútboði sem eingöngu var opið fjárfestum í Svíþjóð.
Útboðinu lauk föstudaginn 16. maí og reyndist eftirspurn margföld á við framboð. Alls voru í boði 441.600 sænsk heimildarskírteini, og fengu yfir 3.000 nýir fjárfestar úthlutað SDR-skírteinum.
Gengi í útboðinu var 1.167,8 krónur (eða 87,51 sænskar krónur) á hverja einingu, sem samsvarar 90% af vegnu meðalverði hlutabréfa Alvotech á útboðstímabilinu 9.–16. maí.
Í tengslum við skráninguna býður Alvotech núverandi hluthöfum að breyta hlutabréfum sínum í sænsk heimildarskírteini.
Félagið mun standa straum af þóknunum vegna yfirfærslunnar til Euroclear í Svíþjóð og DNB Bank ASA, sem sér um útgáfu SDR-skírteinanna.
Tilboðið gildir í tólf mánuði frá skráningu, en hluthafar gætu þurft að greiða þjónustugjöld til eigin vörsluaðila eða viðskiptabanka.
