Berkshire Hathaway, fjárfestingafélag Warren Buffet, ákvað að fjárfesta í snyrtivöruverslanarisanum Ultra Beauty á öðrum ársfjórðungi samkvæmt gögnum sem félagið skilaði inn til verðbréfaeftirlits Bandaríkjanna.
Fagfjárfestar í Bandaríkjunum sem eiga hlutabréf fyrir meira en 100 milljónir dala þurfa að greina frá stöðu sinni í lok hvers fjórðungs vestanhafs. Í lok fjórðungsins átti Buffet 690.106 hluti í Ultra Beauty að markaðsvirði 266 milljóna Bandaríkjadala.
Ásamt því að bæta Ultra Beauty við verðbréfasafn sitt jók Buffet stöður sínar í tryggingarfyrirtækinu Chubb og olíufyrirtækinu Occidental Petroleum.
Berkshire losaði á sama tíma um bréf í Capital One Financial, T-Mobile US og Floor & Decor Holdings.
Samkvæmt The Wall Street Journal hafa fjárfestar vestanhafs verið afar hrifnir af Ultra Beauty en fyrirtækið hefur sýnt fram á stöðugan vöxt og stækkandi markaðshlutdeild á hverju ári.
Hins vegar lækkuðu hlutabréf félagsins verulega í mars þegar félagið lækkaði afkomuspá sína fyrir árið vegna aukins kostnaðar í virðiskeðjunni.
Hlutabréfaverð Ultra Beauty hefur lækkað um 33% á árinu en eftir að greint var frá stöðutöku Buffet eftir lokun markaða í gær er áætlað að gengið opni í 374 dölum sem er um 14% hærra en dagslokagengi gærdagsins.
