Stærstu fyrirtæki Danmerkur hafa á undanförnum árum lagt mikla áherslu á fjölbreytni, jafnrétti og inngildingu (e. DEI – Diversity, Equity, Inclusion) í starfsmannahópum sínum, samkvæmt danska viðskiptamiðlinum Børsen.
Nú, þegar nýkjörinn forseti Bandaríkjanna, Donald Trump, hefur lýst yfir stríði gegn „vók kúltur“ stendur þessi stefna frammi fyrir nýjum áskorunum.
Trump hefur undirstrikað mikilvægi þess að fyrirtæki einblíni á fjárhagslegan árangur, en hann hefur jafnframt hafnað stefnum sem hann telur „neyða félagsfræðilegar hugmyndir um kynþátt og kyn inn í alla þætti opinbers starfsemis og einkalífs.“
Í kjölfar embættistöku hans hefur verið gefin út tilskipun frá Hvíta húsinu um að einkafyrirtæki verði hvött til að leggja niður DEI-áætlanir sínar.
Í Bandaríkjunum hafa stórfyrirtæki á borð við Walmart, McDonald's og Meta annaðhvort skorið niður eða hætt alfarið við DEI-verkefni sín á undanförnum mánuðum.
Að sögn Bodil Dam, sérfræðings í jafnréttismálum hjá Kongressen.com, er þróunin ekki eingöngu rakin til endurkomu Trump heldur einnig til hreyfingar gegn „Vók-kúltúr” í ríkjum eins og Flórída.
Dönsk fyrirtæki halda sig til hlés
Þegar Børsen reyndi að ná svörum frá dönskum fyrirtækjum með starfsemi í Bandaríkjunum, á borð við Maersk, Rambøll og Danfoss, kusu þau að tjá sig ekki um DEI-áætlanir sínar.
„Þetta er viðkvæmt mál á þessum tímapunkti,“ segir fulltrúi frá einu fyrirtækjanna, en bætti við að fyrirtækin kjósi frekar að starfa á bak við tjöldin fremur en að taka opinbera afstöðu.
Að sögn Andreas Gylling Æbelø, ráðgjafa í stjórnun og sérfræðings í fjölbreytni og inngildingu, segist hann skilja þennan varfærna tón.
„Fyrirtæki vilja forðast að reita Trump og stuðningsmenn hans til reiði. Þetta er svipuð nálgun og við sjáum í stjórnmálum varðandi Grænlandsmálin,“ segir hann
„Fyrirtæki verða fljótlega dæmd af því hvort þau haldi í DEI-verkefni sín eða gefist upp þegar andstæðingarnir þrýsta á,“ segir Æbelø.
