Eignarhaldsfélagið Egg ehf., í eigu hjónanna Ernu Gísladóttur og Jóns Þórs Gunnarssonar, hefur gert samning um kaup á öllu hlutafé Bílaleigu Flugleiða ehf., umboðsaðila Hertz á Íslandi, með fyrirvara um samþykki Samkeppniseftirlitsins og Hertz International.
Þetta kemur fram í fréttatilkynningu en seljendur Hertz á Íslandi eru Framtakssjóðurinn Horn III slhf. og Norðurlöndin ehf.
„Gangi kaupin eftir verður Bílaleiga Flugleiða systurfélag annarra fyrirtækja í eignasafni Eggs, sem eru bílaumboðið BL, Egg fasteignir, dekkjaheildsölufyrirtækið Mítra, hleðslufyrirtækið Ísorka og Flex langtímaleiga. Líkt og önnur félög í eignasafni Eggs verður rekstur bílaleigunnar áfram með sjálfstæðum hætti og í óbreyttri mynd,“ segir í tilkynningu.
Bílaleiga Flugleiða er á meðal stærstu bílaleiga landsins, með um 3.500 bíla í rekstri á háannatíma ársins. Höfuðstöðvar fyrirtækisins eru við Selhellu 5 í Hafnarfirði og afgreiðslustaðir staðsettir víða um land.
Fyrirtækið keypti bifreiðar fyrir um 5,2 milljarða króna í fyrra sem er meira en tvöföldun frá fyrra ári. Til samanburðar nam kaupverð bifreiða um 2,5 milljörðum árið 2019.
Hertz á Íslandi keypti m.a. hundrað Teslur í fyrra og var fyrst fyrirtækja hér á landi til að fara með umrædda bíla í skammtímaleigu til túrista. Um er að ræða lið í vegferð alþjóðafyrirtækisins Hertz Global sem lagði árið 2021 inn stærstu pöntun í sögu Tesla.
Samkvæmt ársreikningi Bílaleigu Flugleiða fyrir árið 2022 átti félagið Norðurlöndin ehf. 60% hlut í bílaleigunni.
Umrætt félag er í eigu Hendrik Berndsen, Sigfúsar Bjarna Sigfússonar, Sigfúsar Ragnars Sigfússonar og Sigurðar Berndsen.
Hver þeirra á fjórðungshlut í félaginu. Þá átti Horn III, framtakssjóður í rekstri Landsbréfa, 40% hlut í bílaleigunni í lok síðasta árs.
Horn III keypti hlut sinn í bílaleigunni sumarið 2019 af eigendum Norðurlandanna.
