Mikill gagnkvæmur vilji er milli yfirvalda og framáfólks í Raleigh-Durham og stjórnenda Icelandair um að láta fyrsta nýja áfangastað flugfélagsins í Norður-Ameríku eftir heimsfaraldurinn ganga vel upp, enda um stórt skref að ræða fyrir bæði svæðið og fyrirtækið.

Jómfrúarflugið heppnaðist vel, bæði á faglegum og markaðslegum forsendum. Tekið var á móti vélinni með pompi og prakt og hún meðal annars sprautuð í bak og fyrir, en það ku til siðs við slík tilefni.

Fjölmiðlar á staðnum sýndu Boga Nils Bogason forstjóra og öðrum starfsmönnum Icelandair mikinn áhuga við komuna, og sagan segir að meira að segja áhöfnin sem mætt var á undan til að fljúga vélinni heim hafi fengið stjörnumeðferð á borð við myndatökubeiðnir frá ókunnugum þegar út spurðist að um starfsmenn hins gamalgróna íslenska flugfélags væri að ræða.