Félag kvenna í atvinnulífinu heiðrar konur á árlegri Viðurkenningarhátíð.
Hægt verður að tilnefna konur til og með 21. nóvember nk. á árlegri Viðurkenningarhátíð Félags kvenna í atvinnulífinu. Veittar verða viðurkenningar á hátíðinni til þriggja kvenna sem hafa verið konum í atvinnulífinu hvatning og fyrirmynd.
„FKA kallar eftir tilnefningum frá almenningi, atvinnulífinu og hægt er að tilnefna konur í einum flokki eða öllum til og með 21. nóvember nk. Konurnar sem tilnefndar eru þurfa ekki að vera félagskonur FKA heldur hvaðan sem er úr samfélaginu,“ segir í tilkynningu.
Dómnefnd mun meta og á endanum velja konur sem hljóta FKA þakkarviðurkenningu, FKA viðurkenningu og FKA hvatningarviðurkenningu.
Dómnefndin í ár:
Ásgeir Ingi Valtýsson, markaðsséní og einn stofnanda Popp Up.
Edythe Mangindin, ljósmóðir og doktorsnemi, Fæðingarheimili Reykjavíkur.
Hildur Petersen, athafnakona sem sat í fyrstu stjórn FKA og er Þakkarviðurkenningarhafi FKA 2018.
Jón Björnsson, forstjóri Veritas og stjórnarmaður Boozt og Dropp.
Kristján Kristjánsson, fjölmiðlamaður og ráðgjafi, stýrir m.a. Sprengisandi á Bylgjunni.
Rósa Kristinsdóttir, sérfræðingur hjá VEX framtakssjóði og meðstofnandi Fortuna Invest.
