Eitt starf verður til í áliðnaði á hvert megawatt (MW) raforku og er þetta minna en við framleiðslu á járnblendi, við kísilvinnslu eða í netþjónabúi. Þetta kemur fram í svari iðnaðarráðherra við fyrirspurn Ármanns Kr. Ólafssonar alþingismanns. Þar kemur einnig fram að störf í áliðnaði eru mun fleiri en önnur störf í stóriðju hér á landi, hvort sem litið er til þeirra sem nú eru til eða sem eru í undirbúningi eða á hugmyndastigi.
Í álverunum hér á landi starfa 1385 manns og bein störf eru 1,0 á MW. Bein og afleidd störf samanlagt eru hins vegar 3,0 á MW.
Í járnblendinu starfa 200 manns og eru bein störf 1,7 á MW, en bein og afleidd eru 4,2 á MW.
Þrjú erlend fyrirtæki hafa sýnt áhuga á kísilvinnslu og þar yrðu beinu störfin 90-350 eftir því hvert þeirra á í hlut. Bein störf á MW yrðu 1,5-3,5, en bein og afleidd 4,5-12,3.
Þau netþjónabú sem verið hafa í undirbúningi hér á landi gætu orðið vinnustaðir fyrir 15-60 starfsmenn. Bein störf á MW gætu orðið 1,2-2,4 en bein og afleidd 2,4-4,8. Í svari iðnaðarráðherra segir einnig að dæmi sé um það frá Bandaríkjunum að gagnaver útvegi 4,8-6,5 störf á MW, en starfsmennirnir séu ýmist í þjónustu eigenda gagnaveranna eða viðskiptavina. Erfitt sé að áætla fjölda starfsmanna í hugsanlegum gagnaverum á Íslandi með nákvæmni.
