FTSE 250 vísitalan, sem fylgir gengi 250 stærstu fyrirtækja Bretlands, hækkaði um 1,8% í morgun og fór í 20.985 stig. Vístalan dalaði örlítið eftir fyrstu viðskipti en hún hefur þó ekki verið hærri síðan í apríl 2022.
Vísitalan er oft talin betri mælikvarði á efnahag Bretlands en FTSE 100 þar sem fleiri meðalstór fyrirtæki eru í vísitölunni. FTSE 100 vísitalan hækkaði um 0,4% í morgun.
Þingkosningar fóru fram í Bretlandi í gær og vann Verkamannaflokkurinn stórsigur og verður Keir Starmer, formaður flokksins, næsti forsætisráðherra Bretlands.
Hlutabréf í byggingarfyrirtækjum eru að leiða hækkanir í Kauphöllinni í Lundúnum og hefur gengi Persimmon og Vistry hækkað um 3%. Barratt og Taylor Wimpey hafa hækkað um 2%.
Eitt af stærstu kosingaloforðum Verkamannaflokksins var að byggja 1,5 milljón ný heimili og losa um hömlur á byggingariðnaðinum til að greiða fyrir fleiri íbúðabyggingum.
„Ríkisstjórn Verkamannaflokksins gæti greitt leið fyrir hækkun bréfa meðalstórra fyrirtækja ef þeim tekst að ná stöðugleika í ríkisfjármálum og efla traust á breskum efnahag. Starmer er hins vegar að erfa töluvert betra efnahagsástand en forveri sinn þar sem verð verðbólga er komin í 2% markmið og framleiðsla er að aukast á ný,“ segir Victoria Scholar, yfirmaður fjárfestinga hjá Interactive Investor, í samtali við The Guardian.
Pundið hefur hækkað um 0,15% gagnvart Bandaríkjadal. Franska úrvalsvísitalan CAC 40 hefur hækkað um 0,4%, þýska DAX um 0,7% og ítalska FTSE MIB vísitalan hefur hækkað um 0,5%.
„Kosningar losa um ákveðna óvissu í kringum stjórnmál í Bretlandi sem styrkir pundið örlítið sem er einnig að styrkjast gagnvart evrunni,“ segir Scholar.
