Hlutabréfaverð Amaroq hefur hækkað um rúm 3 % í morgun og hefur gengi félagsins aldrei verið hærra.
Hæsta dagslokagengi félagsins var í byrjun marsmánaðar er gengið stóð í 150,5 krónum við lokun markaða. Gengið stendur í 152 krónum þegar þetta er skrifað.
Málmleitarfélagið greindi frá því fyrir opnun markaða að félagið fengi endanlegt leyfi frá stjórnvöldum í Grænlandi fyrir gangsetningu á 1. áfanga vinnslustöðvar félagsins á miðvikudaginn.
Vinnslustöðin hefur síðan starfað á fullum afköstum og framleiddi fyrsta gullið í gær.
Amaroq framleiddi um 1,2 kílógramm af gulli (39 troy-únsur) eftir að vinnsla hafði staðið yfir í 10 klukkustundir.
„Fyrsta framleiðsla á gulli í Nalunaq er stór áfangi í okkar vegferð, sér í lagi þar sem náman mun nú hefja tekjumyndun. Eftir því sem náman færist úr fjárfestingarfasa yfir í rekstur munu áherslur okkar snúa að því að auka við gullmagn og þar með líftíma námunnar, sem og áframhaldandi rannsóknir til að raungera enn frekar virði eignasafns okkar í Grænlandi,” segir Eldur Ólafsson, forstjóri Amaroq Minerals.
