Hlutabréfaverð Festi hefur hækkað um 7% í 241 milljón króna viðskiptum í morgun en samstæðan birti árshlutauppgjör eftir lokun markaða í gær.
Stærstu viðskiptin í dag voru utanþingsviðskipti með um 600 þúsund hluti á genginu 240 krónur sem samsvarar um 144 milljón króna viðskiptum.
Gengi félagsins stendur í 246 krónum þegar þetta er skrifað eftir um 22% hækkun á árinu.
Festi hækkaði afkomuspá sína fyrir árið um 400 milljónir í gærkvöldi eftir að afkoma samstæðunnar á þriðja ársfjórðungi var mun betri en vonir stóðu til en samlegð með Lyfju, sem kom inn í samstæðuna 1. júlí, spilar þar stórt hlutverk.
Afkoma félagsins fyrir árið er nú áætluð á bilinu 12,7 til 13,1 milljarður króna.
Samkvæmt nýbirtu árshlutauppgjöri samstæðunnar nam vörusala félagsins 44,2 milljörðum króna og jókst um 6,9 milljarða eða 18,5% milli ára. EBITDA- fjórðungsins var 4,7 milljarðar og hækkar um 836 milljónir eða 21,4% milli ára en 9,3% án áhrifa Lyfju.
Framlegð af vöru- og þjónustusölu samstæðunnar nam 10,8 milljörðum og jókst um rúma 2,2 milljarða eða 26,3% á milli ára. Aukningin var 9,6% án áhrifa Lyfju.
