Hlutabréfaverð Icelandair lækkaði um 8% í fyrstu viðskiptum í morgun eftir árshlutauppgjör félagsins eftir lokun markaða í gær.
Dagslokagengi Icelandair var 1,14 krónur í gær og opnaði gengið í 1,05 krónum í morgun en hefur tekið síðan aðeins við sér og stendur í 1,07 krónum þegar þetta er skrifað.
Hlutabréfaverð flugfélagsins hefur eytt stórum hluta árs undir einni krónu en tók þó við sér í lok septembermánaðar, sér í lagi vegna lækkunar á olíuverði.
Samkvæmt uppgjöri gærdagsins hagnaðist Icelandair um 69,2 milljónir dala eða um 9,5 milljarða króna á þriðja ársfjórðungi. Hagnaður félagsins á þriðja fjórðungi dróst saman um 18% frá sama tímabili í fyrra.
Tekjur félagsins á fjórðungnum drógust saman um 1,2% milli ára og námu 553 milljónum dala eða um 76 milljörðum króna. EBIT-afkoma flugfélagsins lækkaði um fjórðung milli ára og nam 11,4 milljörðum króna.
Bogi Nils Bogason, forstjóri Icelandair, sagði í uppgjörinu að hann gerði ráð fyrir „verulegum rekstrarbata“ á fjórða ársfjórðungi og á næsta ári þar sem markaðurinn til Íslands væri að styrkjast á ný.