Hlutabréfaverð Play hefur lækkað um 4% í örviðskiptum í morgun en flugfélagið birti ársuppgjör eftir lokun markaða í gær.
Gengið stendur í 0,98 krónum þegar þetta er skrifað en hlutabréfaverð Play fór síðast undir eina krónu í október í fyrra.
Play tapaði 66 milljónum dala, eða sem nemur 9,2 milljörðum króna, árið 2024, samanborið við 35 milljóna dala tap árið áður.
Flugfélagið tapaði 39,8 milljónum dala, eða um 5,6 milljörðum króna, á fjórða ársfjórðungi samanborið við 17,2 milljóna dala tap á sama tíma árið áður.
Lausafjárstaða Play við lok árs 2024 var 23,6 milljónir dala, eða um 3,3 milljarðar króna, borið saman við 21,6 milljónir dala í árslok 2023. Eigið fé félagsins var neikvætt um 33,1 milljón dala, eða um 4,6 milljarða króna í árslok 2024.
Einar Örn Ólafsson forstjóri Play útilokaði ekki að félagið myndi þurfa að fara í hlutafjáraukningu ef markaðsaðstæður breytast.
„Lausafjárstaðan hefur styrkst frá sama tíma á síðasta ári og miklar framfarir orðið í rekstrarhorfum Play. Þó er ekki hægt að útiloka að markaðsaðstæður breytist og að til álita komi að auka hlutafé,“ segir Einar Örn Ólafsson, forstjóri Play, í uppgjörstilkynningu flugfélagsins.
Tekjur Play jukust um 4% á milli ára og voru 292 milljónir dala árið 2024, eða hátt í 41 milljarður króna.
Í uppgjörstilkynningu Play segir flugfélagið skýr merki í uppgjöri fjórða ársfjórðungs um að nýtt viðskiptalíkan sem félagið tilkynnti um í haust sé farið að skila bættum árangri.
Umrædd breyting felur í sér að það leggur nú aukna áherslu á þjónustu til sólarlandaáfangastaða frá Íslandi en dregur aftur á móti töluvert úr umsvifum tengiflugs á milli Norður-Ameríku og Evrópu.
Fram kemur í uppgjörinu að farþegatekjur á hvern framboðinn sætiskílómetra (RASK) á fjórða ársfjórðungi jukust um 17% á milli ára, vegna hærra meðalverðs og betri sætanýtingar.
EBIT-afkoma félagsins á fjórða ársfjórðungi batnaði um 4,7 milljónir dala á milli ára og var neikvæð um 15,3 milljónir dala. Bætt EBIT-afkoma á fjórðungnum er rakin til hærri meðaltekna, betri sætanýtingar og aðhaldsaðgerða.
